پاکستان سپر لیگ سیزن 9 کے افتتاحی میچ میں اسلام آباد یونائیٹڈ نے دفاعی چمپئن لاہور قلندر کو 8 وکٹوں سے شکست دے دی۔

قذافی اسٹیڈیم لاہور میں کھیلے جانے والے اس میچ میں لاہور قلندر کے 195 رنز کے جواب میں یونائیٹڈ نے 2 وکٹوں کے نقصان پر 18.2 اوورز میں مطلوبہ ہدف حاصل کر لیا۔

اسلام آباد یونائیٹڈ نے ٹاس جیت کر پہلے لاہور قلندر کو بیٹنگ کی دعوت دی، لاہور قلندر نے مقررہ 20 اوورز میں 5 وکٹوں کے نقصان پر 195 رنز بنائے۔

قلندر کے اوپنر صاحبزادہ فرحان نے 57 رنز بنائے، روسی وین ڈیر ڈوسن نے 71 رنز کی شاندار اننگ کھیلی، جبکہ عبداللہ شفیق نے 28 رنز بنائے۔

یونائیٹڈ کے ٹائمل ملز نے 2 ، شاداب خان اور نسیم شاہ نے ایک ایک کھلاڑی کو آؤٹ کیا۔

ہدف کے تعاقب میں یونائیٹڈ کے ایلکس ہیلز نے 36 رنز بنائے، جبکہ کپتان شاداب خان نے 74 رنز ناٹ آؤٹ اور آغا سلمان نے 64 رنز ناٹ آؤٹ کی عمدہ اننگ کھیل کر ٹیم کی فتح کی بنیاد رکھی۔

شاداب خان اور آغا سلمان کے درمیان 138 رنز کی ناقابل شکست شراکت قائم ہوئی۔

لاہور قلندر کی جانب سے زمان خان اور سلمان فیاض نے ایک ایک کھلاڑی کو آؤٹ کیا۔

اسکواڈ:

اسلام آباد یونائیٹڈ: ایلکس ہیلز، کولن منرو، سلمان علی آغا، شاداب خان (کپتان)، اعظم خان، حیدر علی، عماد وسیم، فہیم اشرف، نسیم شاہ، عبید شاہ، تیمل ملز

لاہور قلندرز: فخر زمان، صاحبزادہ فرحان، رسی وین ڈیر ڈوسن، عبداللہ شفیق، لورکن ٹکر، سلمان فیاض، ڈیوڈ ویز، جہانداد خان، شاہین آفریدی (کپتان)، حارث رؤف، زمان خان