پیپلز پارٹی نے وزارت عظمیٰ کے لیے ن لیگ کے امیدوار کو ووٹ دینے کا اعلان کر دیا۔

تفصیلات کے مطابق بلاول بھٹو نے پریس کانفرنس کرتے ہوئے کہا کہ صدر، چیئرمین سینیٹ اور اسپیکر قومی اسمبلی کے لیے امیدوار کھڑے کریں گے، آئینی عہدے ہمارا حق ہیں، صدر کے امیدوار آصف زرداری ہوں گے، خواہش ہے آصف زرداری ملک کے صدر بنیں، پیپلز پارٹی نے فیصلہ کیا ہے کوئی وزارت نہیں لیں گے۔

بلاول بھٹو نے کہا کہ پی پی کے پاس وفاق میں حکومت بنانے کے لیے اکثریت نہیں، سندھ اور بلوچستان میں حکومت بنانے کی کوشش کریں گے، پاکستان میں سیاسی عدم استحکام نہیں چاہتے، نہ حکومت کا حصہ ہوں گے اور نہ ہی اپوزیشن لیڈر بنوں گا، احتجاج کے ساتھ الیکشن کے نتائج کو قبول کریں گے۔

ان کا کہنا تھا کہ ملک میں سیاسی کشیدگی کو بڑھانا نہیں چاہتے، سیاسی کشیدگی جاری رہی تو سب سے زیادہ نقصان عوام کا ہو گا، اپنے آپ کو وزیراعظم کا امیدوار نہیں سمجھتا، آزاد اور ن لیگ کی نشستیں پی پی سے زیادہ ہیں، سیاسی جماعتوں سے رابطوں کے لیے ایک کمیٹی بنا رہے ہیں۔

انہوں نے کہا کہ کمیٹی حکومت سازی کے عمل اور سیاسی استحکام کے لیے کام کریگی، عوام مزید سیاسی عدم استحکام کے متحمل نہیں ہو سکتے، پاکستان کو بحرانوں سے نکالنا ہے، مسلم لیگ ن کے حوالے سے سی ای سی میں سوالات اٹھائے گئے، ماضی کے الیکشنز کی طرح اس الیکشن میں بھی اعتراضات اٹھائے گئے۔

بلاول بھٹو نے کہا کہ الیکشن سے متعلق اعتراضات کو متعلقہ فورمز پر اٹھائیں گے، اعتراضات کے باوجود آج بھی پاکستان کھپے کا نعرہ لگا رہے ہیں، حکومت سازی کے لیے ووٹ دیں گے حکومت کا حصہ نہیں بنیں گے، ن لیگ نے حکومت کا حصہ بننے کی پیشکش کی ہے۔

ان کا کہنا تھا کہ چاہتے ہیں پارلیمنٹ چلے اور دوبارہ الیکشن میں نہ جانا پڑے، اگر حمایت نہیں کرتے تو پھر دوبارہ الیکشن کی طرف جانا پڑے گا، دوبارہ الیکشن کی طرف جائیں گے تو افراتفری ہی دیکھ رہا ہوں، پیپلز پارٹی کی بہت شکایتیں اعتراضات ہیں جو جمع کرائیں گے۔

انہوں نے کہا کہ پی ٹی آئی کی سیاست کا نقصان پاکستان کو ہو رہا ہے، پی ٹی آئی آج بھی ایسے فیصلے کر رہی ہے جو جمہوریت کے حق میں نہی، انتہا پسندی کی سیاست کو چھوڑیں ملک کا سوچیں، جو ماحول بن رہا ہے اس کا فائدہ ملک دشمن اٹھانا چاہتے ہیں، یہ نہیں ہو سکتا ہر الیکشن میں وہی اعتراضات اٹھاتے رہیں۔

چیئرمین پی ٹی آئی نے کہا کہ جو ناانصافی ہوئی امید ہے اس کے ازالے کا موقع ملے گا، والد کو کہا اب آپ لیول پلیئنگ فیلڈ کا فیصلہ کرا دیں، والد صاحب پر ہم سب بھروسہ بھی کرتے ہیں، پاکستان جل رہا ہے کوئی اسے بجھانے کی صلاحیت رکھتے ہیں تو وہ آصف زرداری ہیں۔