انسداد دہشت گردی عدالت لاہورنے 7 مقدمات میں بانی چیئرمین پی ٹی آئی کی عبوری ضمانتوں پرسماعت کرتے ہوئے نو فروری تک توسیع کردی۔

بانی چیرمین پی ٹی آئی کی اڈیالہ جیل سے ویڈیو لنک سے حاضری نہیں لگ سکی، بانی چیئرمین پی ٹی آئی کے وکیل بیرسٹر سلمان صفدرعدالت میں پیش ہوئے۔

وکیل سلمان صفدرنے عدالت سے کہا کہ جب ملزم کی ویڈیو لنک پر حاضری ہوگی تو ہی دلائل دونگا۔

تین مقدمات کی سماعت کورٹ نمبر 1 اور چار مقدمات کی سماعت کورٹ نمبر 3 میں ہوئی۔ عدالت نے آئندہ سماعت پر بانی پی ٹی آئی کے وکیل بیرسٹر سلمان صفدر سے دلائل طلب کر لیے۔

ایڈمن کورٹ میں جناح ہاؤس حملہ، عسکری ٹاورحملہ اور تھانہ شادمان نذر آتش کیسز میں سماعت ہوئی۔ انسداد دہشت گردی عدالت کے ایڈمن جج محمد نوید اقبال نے تین ضمانتوں پر سماعت کی۔

عدالت نے بانی ہی ٹی آئی کو جیل سے طلبی کی درخواست پر جواب طلب کر لیا۔ بانی پی ٹی آئی کے وکیل بیرسٹر سلمان صفدر نے جیل سے طلبی کی درخواست دائر کر رکھی ہے۔

بیرسٹرسلمان صفدرنے مؤقف اپنایا کہ جیل سے ویڈیو لنک پر بانی چیرمین پی ٹی آئی کی حاضری نہیں لگ رہی، استدعا ہے کہ عدالت بانی پی ٹی آئی کو عدالت میں طلب کرنے کا حکم دے۔ گرفتاری سے پہلے بانی پی ٹی آئی باقاعدگی سے عدالت پیش ہوتے رہے تھے۔

اے ٹی سی جج ارشد جاوید چدھڑ کی عدالت میں بانی پی ٹی آئی کی چارعبوری ضمانتوں پرسماعت ہوئی۔

مسلم لیگ نون آفس جلانے، کلمہ چوک پرکنٹینر جلانے، ضلے شاہ قتل، زمان پارک جلاؤ گھیراؤ سمیت چار مقدمات کورٹ نمبر 3 میں لگے ہوئے ہیں۔