کے پی سے خواتین کی مخصوص نشست پر جمعیت علمائے اسلام کی امیدوار کے کاغذات نامزدگی مسترد ہونے کے معاملے پرعدالت نے حنا بی بی کے کاغذات منظور کرنے کا حکم دے دیا۔

سپریم کورٹ نے ریٹرننگ آفیسر، الیکشن ٹریبونل اورہائیکورٹ کے فیصلے کالعدم قراردیتے ہوئے الیکشن کمیشن کو حنا بی بی کا نام پارٹی کی جانب سے دی گئی قومی اسمبلی کی فہرست میں شامل کرنے کی ہدایت کردی۔

عدالت نے کہا کہ حنا بی بی کا نام پہلے سے ہی پارٹی لسٹ میں چوتھے نمبرپرموجود ہے۔

وکیل کامران مرتضٰی نے کہا کہ حنا بی بی نےغلطی سے کاغذات نامزدگی میں قومی اسمبلی کے بجائے صوبائی اسمبلی لکھا تھا، پارٹی نے خواتین کی مخصوص نشست پرحنا بی بی کو قومی اسمبلی کی لسٹ میں نام الیکشن کمیشن میں جمع کرایا تھا۔

جسٹس مسرت ہلالی نے کہا کہ قومی اسمبلی کے بجائے صوبائی اسمبلی لکھا اورفیس بھی صوبائی اسمبلی کی جمع کرائی۔ وکیل نے جواب دیا کہ غلطی کا پتہ چلتے ہی حنا بی بی نے دوبارہ قومی اسمبلی کی فیس بھی جمع کرا دی تھی۔ پارٹی کی ترجیحی لیسٹ میں صدف یاسمین کا نام تیسرے نمبرپرتھا۔

وکیل کامران مرتضیٰ نے مؤقف اپنایا کہ صدف یاسمین سے بات ہوئی انہوں نے کاغذات نامزدگی جمع ہی نہیں کرائے، جس پرجسٹس محمد علی مظہرنے کہا کہ اگر دوسری خاتون نے کاغذات جمع ہی نہیں کرائے تو پھر بات ہی ختم ہوگئی۔

چیف جسٹس قاضی فائزعیسٰی کی سربراہی میں تین رکنی بینچ نے سماعت کی۔