پاکستان کرکٹ ٹیم کے سابق کپتان سرفراز احمد نے پی ایس ایل 9 میں محمد عامر کی کارکردگی سے متاثر ہوکر انہیں قومی ٹیم میں واپسی کا مشورہ دے دیا۔

مقامی نیوز چینل پر گفتگو کرتے ہوئے سابق کپتان سرفراز احمد نے فاسٹ بولر محمد عامر کی صلاحیتوں پر اعتماد کا اظہار کرتے ہوئے ٹی ٹوئنٹی کرکٹ میں ان کی اہمیت پر زور دیا۔

سرفراز احمد نے کہا ’’ہماری ٹیم میں محمد عامر کی شمولیت سے بہت فرق پڑا ہے جب کہ وہ بہت اچھی بولنگ کروا رہے ہیں اور انہیں ٹی ٹوئنٹی کرکٹ کھیلنے کا کافی تجربہ ہے۔

سابق کپتان کہتے ہیں ’’میں نے ہمیشہ عامر کو بولا ہے کہ وہ اب بھی پاکستان کے لیے کھیل سکتے ہیں اور وہ پاکستان کے لیے کارآمد بھی ثابت ہوسکتے ہیں لیکن یہ ان ہی پر منحصر ہے کہ وہ قومی ٹیم کے ساتھ اپنے مستقبل کو کس طرح دیکھتے ہیں‘‘۔

پی ایس ایل 9 میں کوئٹہ گلیڈی ایٹرز کے امید افزا آغاز کو تسلیم کرتے ہوئے انہوں نے کہا کہ ابھی کچھ کہنا قبل از وقت ہوگا لیکن ہماری ٹیم کا کمبی نیشن اچھا ہے اور اگر ہم اسی طرح کھیلتے رہے تو ٹیم کو اچھے نتائج ملنے کا امکان ہے۔

ریلی روسو کی کپتانی پر بات کرتے ہوئے سابق کپتان نے کہا ’’میں پر سکون ہوں اور کھیل سے لطف اندوز ہورہا ہوں، ریلی روسو واقعی ٹیم کی اچھی قیادت کررہے ہیں‘‘۔

واضح رہے کہ کوئٹہ گلیڈی ایٹرز پی ایس ایل 9 میں اب تک دو میچز کھیل کر ناقابل شکست رہی ہے، پہلے میچ میں پشاور زلمی کو 16 رنز سے شکست دی تھی جب کہ دوسرے میچ میں لاہور قلندرز کے خلاف 5 وکٹوں سے کامیابی حاصل کی۔