اسلام آباد: رواں مالی سال کے سات ماہ میں ترسیلات زر میں 50 کروڑ ڈالر کی کمی ریکارڈ کی گئی ہے۔

وزارت خزانہ نے ماہانہ معاشی آؤٹ لک جاری کردیا ہے جس کے مطابق رواں مالی سال کے سات ماہ میں ترسیلات زر میں 50 کروڑ ڈالر کی کمی ہوئی۔

رپورٹ کے مطابق رواں مالی سال کے سات ماہ میں 15 ارب 80 کروڑ ڈالر کی ترسیلات زر موصول ہوئیں جب کہ گزشتہ مالی سال اسی عرصے میں 16 ارب 30 کروڑ ڈالر کی ترسیلات تھیں۔

رواں مالی سال کے 7 ماہ میں برآمدات میں 9.3 فیصد کا اضافہ ریکارڈ کیا گیا، برآمدات 16.4 ارب ڈالر سے بڑھ کر 18 ارب ڈالر تک پہنچ گئیں۔ درآمدات میں جولائی تا جنوری 11.1 فیصد کی کمی ریکارڈ کی گئی اور درآمدات 33.5 ارب ڈالر سے کم ہوکر 29.8 ارب ڈالر تک رہیں۔

کرنٹ اکاؤنٹ خسارے میں 7 ماہ میں 71.2 فیصد کی کمی ہوئی، براہ راست غیر ملکی سرمایہ کاری میں سات ماہ میں 21.4 فیصد کی کمی ہوئی جب کہ زرمبادلہ کے ذخائر 9 ارب 25 کروڑ ڈالر سے بڑھ کر 13 ارب ڈالر سے تجاوز کرگئے۔

ایف بی آر محصولات میں سات ماہ میں 29.8 فیصد کا اضافہ ہوا اور رواں مالی سال کے 7 ماہ میں نان ٹیکس آمدنی میں 116.5 فیصد اضافہ ہوا جب کہ رواں مالی سال جولائی تا جنوری مالیاتی خسارے میں 43 فیصد کا اضافہ ریکارڈ کیا گیا۔

علاوہ ازیں رواں مالی سال کے 7 ماہ میں پرائمری بیلنس میں 103.6 فیصد کا اضافہ ہوا، جولائی تا جنوری مہنگائی کی شرح 28.7 فیصد رہی۔