سربراہ  مجلس وحدت المسلمین علامہ راجہ ناصر عباس کی جانب سے پی ٹی آئی اعلان کا خیر مقدم کیا گیا ہے۔

سربراہ  مجلس وحدت المسلمین علامہ راجہ ناصر عباس کہتے ہیں کہ پاکستان تحریک انصاف کے حمایت یافتہ کامیاب اراکین اسمبلی کی مجلس وحدت المسلمین میں شمولیت کے فیصلے پر خوش آمدید کہتے ہیں۔

انہوں نے کہا کہ مجلس وحدت المسلمین بانی چیئرمین کی اپنی جماعت ہے، جماعت کے حوالے سے جو چاہے فیصلہ کرسکتے ہیں۔ ہم اسے بلامشروط اور من و عن قبول کریں گے۔

راجہ ناصر عباس کہتے ہیں کہ ہمارا روز اول سے یہ موقف بھی رہا ہے، ہم نے اپنے عمل و کردار سے بھی یہ ثابت کیا ہے کہ ہم کسی جماعت پر بوجھ نہیں بنتے۔

ان کا کہنا تھا کہ مشکل وقت میں باوفا دوست بن کر ساتھ نبھاتے ہیں، پاکستان تحریک انصاف کے ساتھ ہمارا اتحاد، آزاد خارجہ پالیسی، داخلی خودمختاری، سرحدوں کےتحفظ، عالمی طاقتوں کی غلامی سے انکار کے موقف پر ہے۔

سربراہ  ایم ڈبلیو ایم نے کہا کہ ہمارا پی ٹی آئی سے اتحاد مسلم ممالک سے برادرانہ تعلقات اور گلگت بلتستان کے لیے آئینی حقوق کے حصول بیانیہ کی بنیاد پر ہے جو خون کے آخری قطرے تک قائم رہے گا۔۔

انہوں نے مزید کہا کہ بانی چئیرمین کی قیادت میں پوری قوم مل کر وطن عزیز کو ایک آزاد، خود مختار اور باوقار ریاست بنانے میں بھرپور کردار ادا کرے گی۔