پاکستان کرکٹ بورڈ نے لاہور میں پاکستان سپر لیگ (پی ایس ایل) کے نئے سیزن کی ٹرافی کی رونمائی کردی ہے۔

لاہور کے پولو گراؤنڈ میں تقریب رونمائی منفرد انداز میں منعقد کی گئی، جہاں قومی اور بین الاقوامی گھڑ سوار ٹیمیں جھنڈے اٹھائے پنڈال پر پہنچیں۔

تقریب میں چیئرمین پی سی بی محسن نقوی سمیت تمام ٹیموں کے مالکان موجود تھے جب کہ خصوصی بینڈ نے بھی مختلف دھنیں بجاکر تقریب کو یادگار بنادیا۔

علاوہ ازیں تقریب میں شاہین آفریدی، سرفراز احمد، شان مسعود، محمد رضوان اور شاداب خان سمیت ٹیموں کے کپتانوں نے بھی شرکت کی۔

اس موقع پر چیئرمین پی سی بی محسن نقوی کا کہنا تھا ’’یہ اعلان کرتے ہوئے خوشی ہورہی ہے کہ پی ایس ایل کے نویں سیزن کا آغاز ہونے جارہا ہے جب کہ میں یہ کہتے ہوئے فخر محسوس کرتا ہوں کہ پی ایس ایل پاکستان کرکٹ کے لیے کامیابی کی کہانی جاری رکھے ہوئے ہے‘‘۔

انہوں نے کہا ’’پی ایس ایل پاکستانیوں کے دلوں سے جڑا ہوا ہے، میں لیگ کے ٹائٹل اسپانسرز کا شکریہ ادا کرنا چاہوں گا جنہوں نے اپنے تعاون سے ہمارے ملک میں کرکٹ کے کھیل کو حقیقی معنوں میں ترقی دی ہے‘‘۔

یاد رہے کہ پی ایس ایل 9 کی ٹرافی کو ’دی اورین ٹرافی‘ کا نام دیا گیا ہے جو ٹورنامنٹ میں حصہ لینے والی تمام ٹیموں کے لیے حوصلہ افزائی کا باعث ہوگی۔

واضح رہے کہ پی ایس ایل 9 کا آغاز 17 فروری سے قذافی اسٹیڈیم لاہور میں ہونے جارہا ہے جب کہ افتتاحی تقریب کے بعد پہلا میچ لاہور قلندرز اور اسلام آباد یونائیٹڈ کی ٹیموں کے درمیان کھیلا جائے گا۔