پی ایس ایل 9 کے چوتھے میچ میں کوئٹہ گلیڈی ایٹرز نے لاہور قلندرز کو 5 وکٹ سے شکست دے دی۔ 

پی ایس ایل 9 کے چوتھے میچ میں لاہور قلندرز نے پہلے بیٹنگ کرتے ہوئے مقررہ 20 اوورز میں 7 وکٹ کے نقصان پر 187 رنز بنائے جس کے جواب میں کوئٹہ گلیڈی ایٹرز نے نوجوان بلے باز خواجہ نافع کی جارحانہ بیٹنگ کی بدولت 5 گیندیں قبل مطلوبہ ہدف حاصل کرلیا۔

لاہور قلندرز بیٹنگ: 

لاہور قلندرز کی جانب سے فخرزمان اور صاحبزادہ فرحان نے اننگز کا آغاز کیا لیکن فخرزمان 6 رنز بناکر عقیل حسین کا شکار بنے جس کے بعد پچھلے میچ میں نصف سنچری بنانے والے راسی وین ڈار ڈاسن 15 رنز بناکر ابرار احمد کا شکار بنے۔

لاہور قلندرز کی جانب سے نوجوان آل راؤنڈر جہانداد خان نے 45 رنز کی جارحانہ اننگز کھیلی جب کہ صاحبزادہ فرحان 62 رنز کے ساتھ نمایاں رہے۔ سکندر رضا 18 اور عبداللہ شفیق 11 رنز ہی بناسکے۔

کوئٹہ گلیڈی ایٹرز کی جانب سے عقیل حسین اور محمد حسنین نے 2،2 جب کہ محمد عامر، محمد وسیم اور ابرار احمد نے ایک ایک وکٹ حاصل کی۔

لاہور قلندرز کی ٹیم میں 2 تبدیلیاں کی گئی ہیں، ڈیو ڈویزے اورلورن ٹکر کی جگہ سکندر رضا اور کارلوس براتھویٹ شامل ہیں۔

کوئٹہ گلیڈی ایٹرز بیٹنگ : 

کوئٹہ گلیڈی ایٹرز کی جانب سے جیسن روئے اور سعود شکیل نے اننگز کا آغاز کیا۔ جیسن روئے 20 رنز کے مہمان ثابت ہوئے اور سعود شکیل نے 40 رنز کی اننگز کھیلی تاہم میچ کے ہیرو نوجوان بلے باز خواجہ نافع رہے۔ کپتان ریلی روسوو 18 اور سرفراز احمد 11 رنز ہی بناسکے۔

خواجہ نافع نے 31 گیندوں پر 60 رنز کی ناقابل شکست اننگز کھیلی جس میں 3 چھکے اور 4 چوکے شامل تھے جب کہ انہوں نے آخری گیند پر زمان خان کو چوکا لگاکر اپنی ٹیم کو فتح سے ہمکنار کروایا۔ اور انہیں مین آف دی میچ سے بھی نوازا گیا۔

کپتان لاہور قلندرز شاہین آفریدی کا کہنا ہے کہ وکٹ بیٹنگ کے لیے اچھی ہے، ہماری بولنگ اچھی ہے ہدف کا دفاع کرسکتی ہیں۔

خیال رہے کہ گذشتہ روز کھیلے گئے تیسرے میچ میں ملتان سلطانز نے کراچی کنگز کو 55 رنز سے شکست دے دی تھی۔

کوئٹہ گلیڈی ایٹرز (پلیئنگ الیون):

ریلی روسو (کپتان)، سعود شکیل (نائب کپتان)، خواجہ نافے، جیسن رائے، سرفراز احمد (وکٹ کیپر)، شیرفین ردرفورڈ، عقیل حسین، محمد وسیم جونیئر، محمد حسنین، محمد عامر اور ابرار احمد۔

لاہور قلندرز (پلیئنگ الیون):

شاہین آفریدی (کپتان)، فخر زمان، صاحبزادہ فرحان (وکٹ کیپر)، رسی وین ڈیر ڈوسن، عبداللہ شفیق، سکندر رضا، سلمان فیاض، کارلوس براتھویٹ، جہانداد خان، ، حارث رؤف اور زمان خان۔