لاہور: قومی اسمبلی کے ایک اور پنجاب اسمبلی کے مزید 6 آزاد امیدواروں نے مسلم لیگ ن میں شامل ہونے کا اعلان کردیا۔

قومی اسمبلی کے حلقہ این اے 92 بھکر سے آزاد حیثیت میں انتخاب جیتنے والے رشید اکبر نوانی مسلم لیگ (ن) میں شامل ہوگئے ہیں۔

پی پی 90 بھکر سے احمد نواز نوانی، پی پی 92 اور 93 بھکر سے کامیاب عامر عنایت شاہانی اور پی پی 272 مظفر گڑھ سے جیتنے والے رانا عبدالمنان نے بھی مسلم لیگ (ن) میں شمولیت کا اعلان کردیا۔

پی پی 205 خانیوال سے اکبر حیات ہراج اور پی پی 212 خانیوال سے اصغر حیات ہراج نے بھی مسلم لیگ (ن) میں شامل ہونے کا اعلان کیا ہے۔

پاکستان مسلم لیگ (ن) کی سینئر نائب صدر اور نامزد وزیر اعلیٰ پنجاب مریم نواز شریف سے آزاد ارکان اسمبلی نے ملاقات کی۔

ملاقات میں رشید اکبر نوانی، احمد نواز نوانی، عامر عنایت شاہانی، رانا عبدالمنان، اکبر حیات ہراج اور اصغر حیات ہراج نے قائد محمد نواز شریف پر مکمل اعتماد کا اظہار کیا۔

مریم نواز شریف نے آزاد ارکان کو مسلم لیگ (ن) میں شامل ہونے پر خیرمقدم کیا اور فیصلے پر انہیں مبارکباد پیش کی۔

آزاد ارکان اسمبلی نے اپنی گفتگو میں کہا کہ قائد محمد نواز شریف، شہباز شریف اور پاکستان مسلم لیگ (ن) کی پاکستان، عوام اور پنجاب کے لیے خدمات تاریخی ہیں، پاکستان کو مسائل سے نکالنے کی صلاحیت اور قابل عمل ایجنڈا صرف مسلم لیگ (ن) کے پاس ہے۔

آزاد ارکان اسمبلی کا کہنا تھا کہ اپنے حلقے کے عوام اور سپورٹرز کی مشاورت سے مسلم لیگ (ن) میں شامل ہونے کا فیصلہ کیا۔

اس موقع پر مریم نواز شریف نے آزاد ارکان اسمبلی سے گفتگو میں کہا کہ آپ کے جذبے اور قومی سوچ کی قدر کرتے ہیں، آپ نے تعمیر پاکستان کے قافلے میں شمولیت اختیار کی ہے۔

ان کا کہنا تھا کہ آپ کی حمایت پاکستان اور عوام کو مشکلات سے نکالنے میں بڑی مددگار ہوگی، ہمارے لئے اقتدار نہیں، ملک اور عوام کی خدمت اہم ہے جب کہ نواز شریف پاکستان کو انتشار سے بچانے اور متحد کرنے والی قوت کا نام ہے۔

مریم نواز کہتی ہیں کہ نواز شریف آج بھی پاکستان جب کہ مخالفین اپنی ذات کی بات کر رہے ہیں، پاکستان کو انتشار نہیں، استحکام چاہیے۔ انتشار پھیلانے والے آج بھی انتشار ہی پھیلا رہے ہیں کیونکہ ان کا ایجنڈا ہی انتشار ہے۔

مسلم لیگ (ن) کی سینئر نائب صدر کا کہنا تھا کہ انتشار کا نشانہ پاکستان ہے، ادارے ہیں۔ پنجاب کے عوام نے ہمیں مینڈیٹ دیا، ان کی خدمت کا حق ادا کریں گے اور پنجاب کو ترقی کی مثال بنائیں گے، ان شا اللہ۔

مریم نواز مزید کہتی ہیں کہ پاکستان کو بچانے کے لئے ایک لاکھ بار بھی سیاسی مفاد قربان کرنا پڑا تو کریں گے، وطن پر جان بھی قربان ہے۔