شام میں حلب کے قریب اسرائیلی فضائی حملوں میں 40 سے زائد افراد ہلاک ہو چکے ہیں۔

تفصیلات کے مطابق اسرائیلی فضائیہ نے ان حملوں میں حلب کے جنوبی مضافاتی علاقے جبرین میں حزب اللہ کے میزائل ڈپو، ہوائی اڈے کے قریب اور قریبی قصبے صفیرہ کو نشانہ بنایا گیا۔

شامی فوج کا کہنا ہے کہ جمعے کے روز شمالی شہر حلب کے قریب اسرائیلی فضائی حملوں میں متعدد افراد ہلاک یا زخمی ہوئے۔ جنگ پر نظر رکھنے والے ایک ادارے کا کہنا ہے کہ ان حملوں میں 44 افراد ہلاک ہوئے جن میں سے زیادہ تر شامی فوجی تھے۔

برطانیہ میں قائم سیریئن آبزرویٹری فار ہیومن رائٹس کا کہنا ہے کہ اسرائیلی حملوں میں حلب کے جنوبی مضافاتی علاقے جبرین میں حلب بین الاقوامی ہوائی اڈے کے قریب لبنان کے عسکریت پسند حزب اللہ گروپ کے میزائل ڈپو اور قریبی قصبے صفیرہ کو نشانہ بنایا گیا۔

آبزرویٹری کا کہنا ہے کہ 36 شامی فوجی، حزب اللہ کے سات جنگجو اور ایران کے حمایت یافتہ گروپ کا ایک شامی رکن ہلاک اور درجنوں افراد زخمی ہوئے ہیں۔

حملوں کے بارے میں اسرائیلی حکام کی جانب سے فوری طور پر کوئی بیان سامنے نہیں آیا ہے۔

اسرائیل، جس نے اپنے شمالی ہمسایہ ملک میں ایرانی مداخلت کو روکنے کا عہد کیا ہے، نے حالیہ برسوں میں شام کے حکومت کے زیر کنٹرول علاقوں میں اہداف پر سیکڑوں حملے کیے ہیں، لیکن وہ شاذ و نادر ہی ان کا اعتراف کرتا ہے۔

جمعرات کو شام کے سرکاری میڈیا نے دارالحکومت دمشق کے قریب فضائی حملوں کی اطلاع دیتے ہوئے کہا کہ ان حملوں میں دو شہری زخمی ہوئے ہیں۔

حزب اللہ کی شام میں مسلح موجودگی ہے کیونکہ اس نے سرکاری افواج کے شانہ بشانہ لڑائی میں حصہ لیا ہے۔

حلب، جو شام کا سب سے بڑا شہر اور کبھی اس کا تجارتی مرکز تھا، ماضی میں اس طرح کے حملوں کی زد میں آ چکا ہے جس کی وجہ سے اس کا بین الاقوامی ہوائی اڈہ بند کر دیا گیا تھا۔