وزیراعظم شہبازشریف کے ہمراہ وزیردفاع خواجہ آصف اور آرمی چیف جنرل عاصم منیر کی سعودی وزیر دفاع شہزادہ خالد بن سلمان بن عبدالعزیز سے ملاقات۔

وزیراعظم محمد شہبازشریف نے سعودی وزیر دفاع عزت مآب شہزادہ خالد بن سلمان بن عبد العزیز آل سعود سے ملاقات کی جب کہ ملاقات میں وزیردفاع خواجہ آصف اور آرمی چیف جنرل عاصم منیر بھی موجود تھے۔

ملاقات میں دوطرفہ امور پر تفصیلی بات چیت ہوئی، وزیر اعظم نے سعودی وزیر دفاع کو نشان پاکستان ملنے پر مبارک باد پیش کی اور سعودی ولی عہد شہزادہ محمد بن سلمان کے لیے نیک خواہشات کا اظہار کیا۔

سعودی وزیردفاع نے بھی وزیراعظم کو منصب سنبھالنے پر مبارکباد دی۔ ان کا کہنا تھا کہ بطورمہمان خصوصی مدعو کرنے پرپاکستان کا شکریہ ادا کرتا ہوں۔

علاوہ ازیں ملاقات میں علاقائی امن وسلامتی اور خطے کی سیکیورٹی کی صورت حال پرتبادلہ خیال کیا گیا، دونوں ممالک کے درمیان دفاع شعبے میں تعاون بڑھانے پر بھی بات چیت ہوئی۔ وزیراعظم نے خادم حرمین شریفین سلمان بن عبدالعزیز کے لیے نیک خواہشات کا اظہار کیا۔

اس موقع پر شہباز شریف کا کہنا تھا کہ پاکستان اورسعودی عرب کے درمیان دیرینہ گہرے برادرانہ تعلقات ہیں، پاکستان سعودی عرب کے ساتھ تعلقات کوقدرکی نگاہ سےدیکھتا ہے۔

وزیراعظم نے کہا کہ سعودی عرب نے ہرمحاذ پر پاکستان کا بھرپورساتھ دیا ہے، سعودی عرب نے پاکستان کی معاشی بہتری کے لیے کلیدی کردار ادا کیا ہے۔