محسن نقوی نے کہا ہے کہ پاکستان میں دہشتگردی کی کوئی گنجائش نہیں۔ قوم کو یقین دلاتے ہیں کہ امن کے لئے آخری حد تک جائیں گے۔ 

وفاقی وزیرداخلہ محسن نقوی نے پشاور میں فرنٹیئر کانسٹیبلری (ایف سی) ہیڈ کوارٹرکا دورہ کیا جہاں کمانڈنٹ ایف سی معظم جاہ انصاری نے وفاقی وزیرداخلہ محسن نقوی کا خیر مقدم کیا۔

وفاقی وزیر داخلہ محسن نقوی کا ایف سی کے افسران سے تعارف کرایا گیا۔ انھوں نے ایف سی ہیڈ کوارٹر میں یادگار شہداء پر حاضری دی۔

وفاقی وزیرداخلہ محسن نقوی نے یادگار شہداء پرپھول رکھے اور فاتحہ خوانی کی۔ انھوں نے شہدائے وطن کے ایصال ثواب کیلئے دعا کی۔

وفاقی وزیرداخلہ محسن نقوی نے ایف سی کے شہداء کو زبردست الفاظ میں خراج عقیدت پیش کرتے ہوئے کہا کہ ایف سی کے بہادر جوانوں نے قیام امن کےلئے کلیدی کردار ادا کیا ہے۔

بعدازاں وفاقی وزیرداخلہ محسن نقوی کی زیر صدارت ایف سی ہیڈ کوارٹر میں اجلاس منعقد ہوا جس میں انھوں نے کہا کہ ایف سی کو مزید مؤثر فورس بنایا جائے گا۔ ایف سی ہیڈ کوارٹر جلد دوبارہ آؤں گا۔

وفاقی وزیرداخلہ نے کہا کہ دشمن امن کو سبوتاژ کرنے کی سازش کر رہا ہے۔ اتحاد کی قوت سے اس سازش کو ناکام بنائیں گے۔  دہشتگردوں اوران کے سہولت کاروں کو وطن عزیز میں چھپنے کی جگہ نہیں ملے گی۔

محسن نقوی نے کہا کہ قائد اعظم کے پاکستان میں دہشتگردی کی کوئی گنجائش نہیں۔ قوم کو یقین دلاتے ہیں کہ امن کے لئے آخری حد تک جائیں گے۔

وفاقی وزیر داخلہ محسن نقوی نے ایف سی ہیڈ کوارٹر کے لان میں شجرکاری مہم کے تحت پودا لگایا۔ کمانڈنٹ ایف سی نے ادارے کی کارکردگی اور دیگر امور کے بارے آگاہ کیا۔