وفاقی وزیر داخلہ و انسداد منشیات محسن نقوی نے قلمدان سنبھالتے ہی وزارت انسداد منشیات کا دورہ کیا۔

وفاقی وزیر داخلہ محسن نقوی نے وزارت انسداد منشیات کا دورہ کیا اور  وزارت انسداد منشیات میں اپنا دفتر استعمال نہ کرنے کا اعلان کیا۔

وفاقی وزیر داخلہ نے کہا کہ میرے لئے ایک ہی دفتر کافی ہے، دو وزارتوں میں دفاتر وسائل کا ضیاع ہے۔

انہوں نے کہا کہ وزارت انسداد منشیات میں میرے دفتر کے سٹاف کو کسی اور شعبے میں تعینات کیا جائے۔

وفاقی وزیر داخلہ و انسداد منشیات نے وزارت انسداد منشیات میں منسٹر آفس بند کرنے کی ہدایت جاری کی۔

انہوں نے کہا کہ منسٹر آفس کی افرادی قوت کو وزارت میں دیگر ضروری جگہوں پر استعمال کیا جائے۔

اس موقع پر وفاقی وزیر داخلہ و انسداد منشیات محسن نقوی کی زیر صدارت اہم اجلاس بھی ہوا جس میں وفاقی وزیر کو وزارت کے امور کے حوالے سے خصوصی بریفنگ بھی دی گئی۔

اجلاس میں محسن نقوی نے کہا کہ آنے والے نسلوں کے مستقبل کو محفوظ بنانے کیلئے منشیات کا سدباب وقت کی اہم ضرورت ہے، اور تمام وسائل کو بروئے کار لاکر منشیات کی لعنت سے چھٹکارا حاصل کریں گے۔

وفاقی وزیر داخلہ و انسداد منشیات محسن نقوی نے مزید کہا کہ منشیات کا  مکروہ دھندہ کرنے والوں سے کسی صورت نرمی نا برتی جائے گی۔

وفاقی وزیر داخلہ و انسداد منشیات محسن نقوی کو سیکرٹری وزارت انسداد منشیات  نے بریفنگ دی۔