کراچی میں رینجرز اور پولیس نے انٹیلیجنس معلومات کی بنیاد پر مشترکہ کارروائی کرتے ہوئے 3 ملزمان کو گرفتار کر لیا۔

ترجمان رینجرز کے مطابق رینجرز اور پولیس کی مشترکہ کارروائی میں اورنگی ٹاؤن اسلامیہ کالونی سے ڈکیتی اور راہزنی کی متعدد وارداتوں میں ملوث تین  ملزمان گرفتار کر لیا گیا۔

ملزمان میں عبدالرحمان عرف گولڈن،آصف عرف تُخن اور عبداللہ شامل ہیں، ملزمان کے قبضے سے دو پسٹل اور ایک موٹرسائیکل بھی برآمد کرلی گئی۔

ملزمان نے اپنے دیگر ساتھیوں کے ہمراہ اسلامیہ کالونی میں پاپڑ کے گودام پر ڈکیتی کی تھی، ڈکیتی کے دوران شہریوں سے دو موبائل فونز اور 1 لاکھ 5 ہزار روپے نقدی لوٹ کر فرار ہوگئے تھے۔

ڈکیتی کی واردات کی سی سی ٹی وی فوٹیج سوشل میڈیا پر وائرل ہوئی تھی، جس میں ملزمان کو لوٹ مار کرکے فرار ہوتے ہوئے دیکھا جاسکتا ہے۔

ترجمان رینجرز کا کہنا ہے کہ ابتدائی تفتیش کے دوران ملزمان نے قصبہ کالونی،بلوچ کالونی،اسلامیہ کالونی،نصرت بھٹو کالونی،حیدری،نارتھ ناظم آباد اور گردونواح کے علاقوں میں ڈکیتی اور لوٹ مار کی 20 سے زائد واردداتوں میں 25 سے زائد موبائل فون اور 5 لاکھ سے زائد کی رقم لوٹنے کا اعتراف کیا ہے۔

ملزم عبداللہ ڈکیت گروہ کی سہولت کاری اور اسلحہ و ایمونیشن فراہم کرنے کے ساتھ ساتھ چھینے ہوئے موبائل فون اور موٹر سائیکلوں کی خرید و فروخت کا کام بھی کرتا تھا۔

ملزمان کے دیگر ساتھیوں کی گرفتاری کےلیے چھاپے مارے جا رہے ہیں۔

ترجمان رینجرز کے مطابق گرفتارملزمان کو بمعہ اسلحہ،ایمونیشن اور مسروقہ سامان مزید قانونی کاروائی کے لیے پولیس کے حوالے کردیا گیا ہے۔