برطانیہ کے نومنتخب رکن پارلیمنٹ جارج گیلووے کا کہنا ہے کہ رشی سونک اور کیراسٹارمر سن لیں برطانیہ میں کسی مسلمان کو نقصان پہنچانے سے قبل میری لاش سے گزر کر جانا ہوگا۔

اسمائیل ایڈ برطانیہ کے سالانہ چیرٹی  ڈنر سے خطاب کرتے ہوئے نومنتخب ممبر پارلیمنٹ جارج گیلووے نے کہا کہ حالیہ ضمنی انتخابات میں عوام نے برطانیہ کی تین بڑی سیاسی جماعتوں کو مسترد کردیا گیا۔

انہوں نے کہا کہ لیبرپارٹی ، حکمران ٹوری پارٹی اور لب ڈیم کی مسلم اور اقلیت مخالف پالیسیوں کی وجہ سے انہیں مسترد کیا گیا ہے، اب رشی سونک اور کئیراسٹارمر کو حکمرانی کے خواب سے بیدار ہوجانا  چاہیے۔

تقریب سے پاکستانی قونصل جنرل مانچسٹر طارق وزیر نے خطاب کرتے ہوئے کہا کہ پاکستان میں پسماندہ علاقوں میں بنیادی سہولتوں کا فقدان ہے اور بہتر روزگار نہ ہونے کی وجہ سے لوگ غربت کی چکی میں پس رہے ہیں، ایسے علاقوں میں اسمائیل ایڈ کی خدمات قابل ستائش ہیں-

اسمائیل ایڈ کے آرگنائزرز شہباز سرور، سجاد سرور اور ابوبکر نے کہا کہ گردے کے مریضوں کے لیے کڈنی  ڈائیلیسس سینٹر میں مستحق نادار افراد کا علاج مکمل فری کیا جارہا ہے اور عنقریب غریب پچوں کی فری تعلیم کیلئے ایک اعلیٰ معیاری درسگاہ کی سہولت فراہم کی جا رہی ہے۔

انہوں نے کہا کہ ان پراجیکٹس کو چلانے میں یہاں موجود برطانوی کمیونٹی کا بے لوث مالی تعاون اہم کردارادا کر رہا ہے۔

شہباز سرور نے کہا کہ آج کی تقریب میں شرکاء نے ایک لاکھ پاؤنڈ سے زائد کی رقم ان بے سہارا لوگوں کیلئے عطیہ کی ہے اور یہ امانت صحیح حقداروں تک پہنچا کر ہمیں قلبی سکون حاصل ہوتا ہے۔

تقریب میں پاکستانی ڈرامہ و فلم آرٹسٹ مومل شیخ، لارڈ میئر مانچسٹر یاسمین ڈار، فلسطین کے ترجمان، عراق، ترکی اور لیبیا کے سفارت کاروں  نے بھی شرکت کی۔