فلسطینی عوام رمضان المبارک کی پہلی تراویح کے لیے مسجد الاقصیٰ میں داخل ہونے میں کامیاب ہوگئے۔

رمضان کا مبارک مہینہ اہل غزہ کے لئے کسی امتحان سے کم نہیں جب کہ عالمی برادری کی بے حسی نے رمضان مبارک میں فلسطینیوں کے لئے مشکلات کھڑی کردی ہیں۔

غزہ میں دسترخوان ہے لیکن بھوک مٹانے کے لئے فلسطینیوں کے پاس خوارک نہیں، لیکن فلسطینیوں کے حوصلے آسمان کی طرح بلند کھلے آسمان تلے زندگی گزارنے پر مجبور ہیں۔

اتوار کی رات ماہ رمضان کی پہلی تراویح اسرائیلی پابندی کے باوجود متعدد فلسطینی نماز تراویح کے لیے مسجد اقصیٰ میں داخل ہونے میں کامیاب رہے۔

صیہونی فورسز نے سیکڑوں فلسطینیوں کو مسجد اقصیٰ میں داخل ہونے سے روک دیا، متعدد فلسطینیون کو فورسز نے حراست میں لے لیا۔

دوسری جانب اسرائیل نے رمضان المبارک کے آغاز پربھی بربریت کا سلسلہ جاری رکھا، اسرائیلی بمباری سے 24 گھنٹوں میں 67 فلسطینی شہید جب کہ 106 زخمی ہوگئے۔

اسرائیلی ہٹ دھرمی کے باعث غزہ میں جنگ بندی معاہدہ بھی نہ ہوسکا، نہتے اور معصوم فلسطینی بغیر سحری روزہ رکھنے پر مجبور ہیں۔

غزہ شہر کے اطراف میں حملوں کے نتیجے میں 10 فلسطینی شہید ہوگئے، تلکرم اور نور شمس پناہ گزین کیمپ پر حملے میں متعدد فلسطینی جام شہادت نوش کرگئے۔

صیہونی فوج نے سیکڑوں فلسطینیوں کو مسجد الاقصیٰ میں داخل ہونے سے بھی روک دیا، غزہ میں اب تک شہدا کی مجموعی تعداد 31 ہزار سے تجاوز کرگئی جب کہ 72 ہزار 654 افراد زخمی ہوچکے ہیں۔