اسلام آباد: فرنچائزز مالکان نے چیئرمین پی سی بی محسن نقوی سے ملاقات کی ہے۔

چیئرمین پی سی بی محسن نقوی سے اسلام آباد کے مقامی ہوٹل میں فرنچائز مالکان اور نمائندوں نے ملاقات کی جس میں فرنچائز مالکان نے محسن نقوی کو چیئرمین پی سی بی کے عہدے کی مبارک باد پیش کی۔

فرنچائزز نے چیئرمین پی سی بی کو ایچ بی ایل پی ایس ایل کے پہلے مرحلے کے لاہور اور ملتان میں میچز کے کامیاب انعقاد پر مبارکباد بھی دی۔

چیئرمین پی سی بی نے ایچ بی ایل پی ایس ایل میں مسلسل تعاون اور اس لیگ کو ایک برانڈ بنانے پر فرنچائز مالکان کا شکریہ ادا کیا۔

چیئرمین پی سی بی محسن نقوی نے کہا کہ پی ایس ایل پاکستان کی پہچان ہے، پی ایس ایل کو مزید خوب سے خوب تر بنانے میں آپ کی تجاویز کا خیر مقدم کیا جائے گا۔

چیئرمین پی سی بی کا کہنا تھا کہ کرکٹ کے فروغ کے لئے قابل عمل تجویز پر عملدرآمد کریں گے۔

اس موقع پر پی سی بی کے چیف آپریٹنگ آفیسر سلمان نصیر،  لیگ کمشنر نائلہ بھٹی، ڈائریکٹر پاکستان سپر لیگ صہیب شیخ بھی موجود تھے۔

فرنچائزز کی نمائندگی ملتان سلطانز کے مالک علی ترین، لاہور قلندرز کے عاطف رانا اور سمین رانا، کوئٹہ گلیڈی ایٹرز کے ندیم عمر اور اسلام آباد یونائیٹڈ کے مالک علی نقوی نے کی۔