سیکیورٹی فورسز نے گوادر پورٹ اتھارٹی کمپلیکس پر بی ایل اے کا حملہ ناکام بنادیا اور جوابی کارروائی میں 8 دہشتگرد ہلاک ہوگئے۔ 

تفصیلات کے مطابق گوادر پورٹ اتھارٹی کمپلیکس کے قریب دھماکوں کے بعد فائرنگ کا واقعہ پیش آیا تاہم پولیس کی جانب سے جوابی کارروائی میں بی ایل اے کے 8 دہشت گرد ہلاک ہوگئے ہیں۔

گوادر میں دہشتگردوں نے جی پی اے کمپلیکس میں گھسنے کی کوشش کی جسے سیکیورٹی فورسز کے جوانوں نے بروقت کارروائی کرتے ہوئے ناکام بنادی۔

گوادر پولیس کے مطابق پورٹ اتھارٹی کمپلیکس میں یکے بعد دیگرے تین دھماکوں کی آوازیں سنائی دی گئی ہیں جس کے بعد جی پی اے کمپلیکس کے اندر سے شدید فائرنگ کا سلسلہ جاری ہوا اور حملہ آوروں سے سیکیورٹی فورسز کے درمیان فائرنگ کا تبادلہ جاری ہے۔

پولیس زرائع  نے بتایا کہ دھماکوں کے علاوہ دوطرفہ شدید فائرنگ کی آوازیں سنی گئی، حملے کے بعد فوری جوابی کارروائی کیلئے پولیس اور سیکیورٹی کے دیگر ادارے پہنچ گئے ہیں اور علاقے کو گھیرے میں لے لیا ہے۔

تاحال حملے کی نوعیت اور اس میں ہوئے نقصانات کی کوئی تفصیل معلوم نہیں ہوسکی ہے۔

یاد رہے کہ گوادر میں حساس مقامات پر ماضی میں ہونے والے شدت پسند حملوں میں بلوچ مسلح پسند تنظیموں کے دعوے سامنے آتے رہے ہیں۔

واضح رہے کہ گوادر پورٹ اتھارٹی کمپلیکس میں پاسپورٹ آفس، الیکشن کمیشن آفس سمیت دیگر سرکاری اداروں کے دفاتر بھی ہیں۔