سعودی عرب کے وزیر دفاع شہزادہ خالد بن سلمان بن عبدالعزیز السعود نے یوم پاکستان کی تقریب میں شرکت کے بعد آرمی چیف جنرل عاصم منیر سے ملاقات کی ہے۔

پاک فوج کے شعبہ تعلقات عامہ (آئی ایس پی آر) کے مطابق سعودی عرب کے وزیر دفاع نے آرمی چیف جنرل عاصم منیر سے ملاقات کی جب کہ نور خان ایئر بیس پہنچنے پر ان کا پرتباک استقبال کیا گیا۔

آئی ایس پی آر کا کہنا ہے کہ شہزادہ خالد بن سلمان بن عبدالعزیز السعود نے مسلح افواج کی مشترکہ یومِ پاکستان پریڈ میں بطور گیسٹ آف آنر خصوصی طور پر شرکت کی۔

ترجمان پاک فوج نے بتایا کہ تقریب میں آمد پر وزیرِ دفاع خواجہ آصف اور آرمی چیف جنرل سید عاصم منیر نے شہزادہ خالد بن سلمان بن عبدالعزیز السعود کا استقبال کیا۔

آئی ایس پی آر کا کہنا تھا کہ شہزادہ خالد بن سلمان بن عبدالعزیز السعود نے شاندار جوائنٹ سروسز پریڈ کا مشاہدہ بھی کیا جب کہ تقریب کے بعد شہزادہ خالد بن سلمان بن عبدالعزیز السعود نے آرمی چیف جنرل سید عاصم منیر سے  ملاقات کی۔

پاک فوج کے شعبہ تعلقات عامہ نے کہا کہ ملاقات میں باہمی دلچسپی کے امور، دوطرفہ تعلقات کے فروغ اور مختلف شعبوں بالخصوص دفاع میں تعاون بڑھانے پر تبادلہ خیال کیا گیا۔

ترجمان پاک فوج نے یہ بھی بتایا کہ اس موقع پر سعودی عرب کے وزیر دفاع کا کہنا تھا ’’سعودی عرب اور پاکستان کے تاریخی اور مضبوط  برادرانہ تعلقات ہیں، سعودی عرب اور پاکستان ہمیشہ ایک دوسرے کے خیر خواہ رہے ہیں‘‘۔

آئی ایس پی آر کے مطابق پاکستان کا دورہ کرنے پر آرمی چیف نے سعودی عرب کے وزیر دفاع  کا شکریہ ادا کیا جب کہ معززمہمان نے بھی یوم پاکستان پریڈ میں بطور گیسٹ آف آنر مدعو کرنے پر آرمی چیف کا شکریہ ادا کیا۔

آئی ایس پی آر کا مزید کہنا تھا کہ پاکستان کے ایک روزہ کامیاب دورے کے بعد سعودی عرب کے وزیر دفاع شہزادہ خالد بن سلمان بن عبدالعزیز وطن واپس روانہ ہوگئے ہیں۔

روانگی سے قبل چیف آف آرمی اسٹاف جنرل سید عاصم منیر نے شہزادہ خالد بن سلمان کو نور خان ائیر بیس سے خدا حافظ کہا۔