ماہ رمضان میں عوام کو اشیائے خوردونوش پر ریلیف دینے کا نگراں وفاقی کابینہ کا فیصلہ کھٹائی میں پڑ گیا ہے۔

تفصیلات کے مطابق نگراں وفاقی کابینہ کی جانب سے عوام کو ماہ رمضان میں ساڑھے 7 ارب روپے کا ریلیف پیکج دیا جا رہا ہے، مگر اس ریلیف میں شہری 3 بنیادی اشیاء پر ریلیف حاصل نہیں کر پائیں گے۔

ذرائع کا کہنا ہے کہ حکومت کے اس ساڑھے 7 ارب روپے کے ریلیف پیکج میں 3 بنیادی اشیاء چینی، گھی اور آٹا شامل نہیں ہوں گے اور یہ تینوں اشیاء اپنی موجودہ قیمتوں پر ہی فروخت کی جائیں گی۔

واضح رہے کہ ماہ رمضان میں ان تینوں کا اشیاء کا استعمال بڑھ جاتا ہے۔

ذرائع کے مطابق بی آئی ایس پی صارفین کے لیے چینی کی فی کلوقیمت 109 روپے برقرار رہے گی۔

آٹے کے 10 کلو تھیلے کی قیمت 648 روپے برقرار رکھنے کا فیصلہ کیا گیا ہے۔

رمضان پیکیج کےتحت گھی کی فی کلو قیمت 365 روپے برقرار رہے گی۔

ذرائع کا کہنا ہے کہ بی آئی ایس پی صارفین کیلئے چینی، آٹا اور گھی کی قیمت پہلےہی کم ہے۔

موجودہ سبسڈی کے باعث قیمتیں مزید کم نہ کرنے کا فیصلہ کیا گیا ہے جبکہ یوٹیلیٹی اسٹورز پر رمضان پیکیج کا اطلاق 4 مارچ کے بجائے 5 مارچ سے ہو گا۔

ذرائع کا کہنا ہے کہ نگراں وفاقی کابینہ نے رمضان پیکیج 4 مارچ سے شروع کرنے کی منظوری دی تھی لیکن نئے وزیر اعظم منتخب ہونے کے باعث تاریخ میں ردوبدل کیا گیا۔