سعودی ولی عہد شہزادہ محمد بن سلمان نے شہباز شریف کو دوبارہ وزیر اعظم منتخب ہونے پر مبارکبادپیش کی ہے۔

تفصیلات کے مطابق سعودی ولی عہد  شہزادہ محمد بن سلمان نے وزیر اعظم شہباز شریف سے ٹیلیفونک رابطہ کیا اور انہیں دوبارہ منتخب ہونے پر مبارکباد پیش کی۔

وزیر اعظم نے مبارکباد کے پرجوش پیغام پرسعودی ولی عہد شہزادہ محمد بن سلمان کا شکریہ ادا کیا۔

انہوں نے شاہ سلمان بن عبدالعزیز کی صحت و تندرستی کے لیے نیک تمناؤں اور دعاؤں کا اظہار کرتے ہوئے کہا کہ پاکستان کے عوام شاہ سلمان  اور ولی عہد کے لیے بے پناہ محبت اور احترام رکھتے ہیں۔

شہباز شریف نے  سعودی قیادت کے ساتھ ساتھ سعودی عوام کو بھی رمضان المبارک کے بابرکت مہینے کی مبارکباد دی اور کہا دعا ہے یہ مقدس مہینہ پوری دنیا کے مسلمانوں کے لیے  امن اور خوشحالی لائے۔

وزیراعظم نے مزید کہا کہ  پاکستان کو سعودی عرب کے ساتھ تاریخی، گہرے اور برادرانہ تعلقات پر فخر ہے۔  دونوں ممالک ہمیشہ ایک دوسرے کے ساتھ کھڑے رہے ہیں۔

انہوں نے  پاکستان کے لیے غیر متزلزل حمایت پر سعودی عرب کی تعریف کرتے ہوئے سعودی ولی عہد کو جلد پاکستان کا سرکاری دورہ کرنے کی دعوت  بھی دی۔

شہباز شریف نے کہا کہ پاکستانی عوام شاہی عظمت کے پرتپاک استقبال کے منتظر ہیں۔

سعودی ولی عہد شہزادہ محمد بن سلمان نے وزیراعظم کی نیک خواہشات پر ان کا شکریہ ادا کرتے ہوئے کہا کہ دونوں ممالک کے قریبی برادرانہ تعلقات ہیں۔