لاہور: وزیر اعلیٰ پنجاب مریم نواز شریف کا کہنا ہے کہ عوام کے جان و مال کی حفاظت سے بڑی قومی خدمت کوئی نہیں ہوسکتی۔

وزیر اعلیٰ پنجاب مریم نواز شریف کی زیر صدارت انسداد دہشت گردی ڈیپارٹمنٹ کے حوالے سے اجلاس ہوا جس میں مریم نواز نے کہا کہ دہشت گردی کے سدباب کے لئے ہمارا عزم غیر متزلزل ہے۔

مریم نواز شریف کہتی ہیں کہ دہشت گردوں کی سرکوبی کے لئے سی ٹی ڈی کا کردار ناقابل فراموش ہے۔ معاشی ترقی کے لئے پائیدار امن و استحکام ناگزیر ہے جب کہ عوام کے جان و مال کی حفاظت سے بڑی قومی خدمت نہیں ہوسکتی۔

وزیر اعلیٰ پنجاب کا کہنا ہے کہ اسلام کے نام پر انتہا پسندی اور قتل غارت قابل مذمت ہے، سی ٹی ڈی کے افسر اور جوان  گمنام ہیرو ہیں، انہیں سلوٹ پیش کرتی ہوں۔ سی ٹی ڈی جیسے ادارے کے قیام کا کریڈٹ محمد شہباز شریف کو جاتا ہے۔

انہوں نے کہا کہ سی ٹی ڈی کے افسر اور جوان قابل تحسین قومی خدمت سر انجام دے رہے ہیں جب کہ سی ٹی ڈی کے افسر اور جوان صلہ و ستائش کی پروا کئے بغیر سرگرم عمل ہیں۔ امن و امان کے لئے کوشاں ادارے کے لئے تمام تر وسائل مہیا کئے جائیں گے۔

مریم نواز نے بتایا کہ پنجاب کی ترقی، سرمایہ کاری اور سیاحت کے فروغ کا مشن پائیدار امن و امان کے بغیر ممکن نہیں۔

سی ٹی ڈی کے سربراہ ایڈیشنل آئی جی وسیم احمد خان نے سی ٹی ڈی کی کارکردگی پر بریفننگ دی جب کہ وزیر اعلیٰ مریم نواز نے سی ٹی ڈی کی کارکردگی کو سراہا جب کہ انہوں نے سی ٹی ڈی ہیڈ کوارٹر کا دورہ بھی کیا۔

وزیر اعلیٰ مریم نواز نے خواتین افسروں سے ملاقات کی اور گروپ فوٹو بھی بنوایا۔ وزیر اعلیٰ نے جم کا افتتاح کیا اور دورہ بھی کیا جب کہ مریم نواز ڈے کیئر سینٹر میں بچوں کے ساتھ بیٹھ گئیں اور باتیں کرتی رہیں۔

صوبائی مشیر پرویز رشید، صوبائی وزیر اطلاعات عظمیٰ زاہد بخاری، ایم پی اے ثانیہ عاشق، چیف سیکرٹری، سیکرٹری داخلہ، خزانہ، آئی جی پنجاب پولیس، ایڈیشنل آئی جی سی ٹی ڈی، ایڈیشنل آئی جی آپریشنز اور دیگر حکام بھی موجود تھے۔