کراچی: گورنر سندھ کامران خان ٹیسوری شہید لیفٹیننٹ کرنل سید کاشف علی شہید کی رہائش گاہ پہنچ گئے۔

گورنر سندھ کامران خان ٹیسوری نے شہدا کے اہل خانہ سے تعزیت کی شہید لیفٹیننٹ کرنل سید کاشف علی کو خراج عقیدت پیش کیا جب کہ گورنر سندھ نے شہداء کے بلند درجات کے لیے دعا کی۔

کامران ٹیسوری کا کہنا تھا کہ آج میں یہاں سید کاشف شہید کے گھر آیا ہوں، ان کے والد اور بھائی سے تعزیت کی جب کہ میرے ساتھ ایم این اے فرحان چشتی بھی موجود ہیں۔

انہوں نے کہا کہ شہید کے والد کی آنکھوں میں آنسو تھے لیکن ساتھ ساتھ اس بات کی خوشی ہے کہ پاکستان کے لئے جان دی، پی ایم اے کاکول میں انہوں نے کہا کہ میں آرمی میں شہادت کے لئے آیا ہے۔

ان کا کہنا تھا کہ جو لوگ افواج پاکستان اور اسٹیبلشمنٹ کو تنقید کا نشانہ بناتے ہیں کسی بھی سازش کے تحت تو وہ لوگ شہید کے والد سے آ کر ملیں، دشمن آپ کو برباد کرنے کے لئے ہر وقت تیار ہے لیکن سلام پیش کرتا ہوں اپنی افواج پاکستان کو۔

گورنر سندھ نے کہا کہ کاشف شہید نے کراچی کا بیٹا ہونے کا ثبوت دیا ہے اور مجھے فخر ہے میں ان کی رہائش گاہ پر کھڑا ہوں، ہم سب کو ایک قوم ہونے کا ثبوت دینا ہے۔ یہ جان کا نذرانہ اس ملک کی خاطر دیا گیا ہے، خدارا اس ملک کے خاطر ایک ہوجائیں۔

کامران ٹیسوری کہتے ہیں کہ ہمارا دشمن ملک بھارت ہے اور بھارت میں انتخابات ہونے جارہے ہیں، بھارت کے وزیراعظم نے اپنی تقریر میں کہا کہ میں نے پاکستان کو امداد مانگنے والا بنادیا ہے جب کہ تمام دہشت گردی کے پیچھے بھارت کا ہاتھ ہے اور بھارت پاکستان کو معاشی طور پر ختم کرنا چاہتا ہے۔

انہوں نے مزید کہا کہ ہم ایک قوم بن کر ہی دشمن کا مقابلہ کرسکتے ہیں، آرمی چیف کا ایس آئی ایف سی بنانا پاکستان کے لئے خوش آئند ہے، ایس آئی ایف سی پاکستان کو معاشی طور پر مضبوط کرسکتا ہے۔