ترکیہ کے صدر رجب طیب اردوگان کا کہنا ہے کہ شہباز شریف کے بحیثیت وزیراعظم انتخاب پر بہت خوشی ہوئی ہے۔

تفصیلات کے مطابق  ترکیہ کے صدر رجب طیب اردوگان نے محمد شہباز شریف کو ٹیلیفون کیا اور وزیراعظم منتخب ہونے پر مبارکباد پیش کرکے نیک تمناؤں کا اظہار کیا۔

ترکیہ کے صدر نے دونوں ممالک کے درمیان دوستی اور بھائی چارے کے رشتے کو مزید مضبوط بنانے کے عزم کا اعادہ  کرتے ہوئے کہا کہ پاکستان اور ترکیہ کی ترقی کے لیے مل کر کام کریں گے۔

شہباز شریف نے کہا کہ رجب طیب اردوگان کے تہنیتی جذبات کا خیرمقدم کرتا ہوں۔انہوں نے ہمیشہ مسئلہ کشمیر پر پاکستان کے موقف کی حمایت کی ہے۔

دونوں رہنماؤں کے درمیان سائپرس کے حوالے سے بھی بات چیت ہوئی۔

شہباز شریف نے کہا کہ ہائی لیول اسٹریٹجی ڈائیلاگ کے ساتویں سیشن میں پاکستان اور ترکیہ مل کر اس حوالے سے مزید پیشرفت کا جائزہ لیں گے۔

انہوں نے کہا کہ ترکیہ نے ہمیشہ پاکستان میں دہشت گردی کے واقعات کی مذمت کی۔ انشاءاللہ پاکستان دہشت گردی کو جڑ سے ختم کرے گا۔

شہباز شریف نے کہا کہ ترکیہ نے ہمیشہ غزہ اور فلسطین کے تنازعات پر آواز بلند کی جو لائق تحسین ہے۔ مسلم ممالک ترکیہ کے اس کردار کو ہمیشہ قدر کی نگاہ سے دیکھتے ہیں۔

ان کا مزید کہنا تھا کہ رجب طیب اردوگان ایک تجربہ کار رہنما ہیں، ہمیں ان کے تجربہ سے مستفید ہونے کی ضرورت ہے۔

دونوں رہنماؤں نے ایک دوسرے کے لیے نیک تمناؤں کا بھی اظہار کیا۔