اسلام آباد: وزیراعظم محمد شہباز شریف کی زیرِ صدارت ایس آئی ایف سی ایپکس کمیٹی اجلاس کا اعلامیہ جاری۔

وزیراعظم محمد شہباز شریف کی زیرِ صدارت ایس آئی ایف سی ایپکس کمیٹی کا اجلاس ہوا جس کا اعلامیہ جاری کر دیا گیا ہے۔

ایپکس کمیٹی اجلاس میں سابق نگران وزیراعظم انوار الحق کاکڑ اور سابق نگران کابینہ نے شرکت کی جب کہ ایس آئی ایف سی کو ملکی معیشت، نجکاری اور سرمایہ کاری پر بریفنگ دی گئی۔

چیف آف آرمی اسٹاف نے ملکی معیشت کی بحالی کے اقدامات میں بھرپور حمایت اور معاونت کے عزم کا اظہار کیا۔

آرمی چیف کا کہنا تھا کہ معاشی صلاحیت کے مکمل استعمال کے لیے محفوظ ماحول کی فراہمی یقینی بنائی جائے گی۔

ایپکس کمیٹی کی 2023 میں ایس آئی ایف سی کی لانچنگ پر وزیراعظم شہباز شریف کی لیڈرشپ کی تعریف کی گئی۔

ملک کو درپیش چیلنجز سے نکلنے کے لیے ایپکس کمیٹی نے اتفاق رائے سے آگے بڑھنے پر زور دیا جب کہ ایپکس کمیٹی نے پالیسیوں کے تسلسل اور ملکی مفاد میں سخت فیصلے لینے کے عزم کا اظہار کیا۔

ایس آئی ایف سی ایپکس کمیٹی اجلاس کا اعلامیہ

اعلامیہ میں کہا گیا ہے کہ ایس آئی ایف سی کے قیام اور کونسل کی ترویج و ترقی پر فورم نے وزیراعظم کو خراج تحسین پیش کیا ہے جب کہ کمیٹی نے ملک کو درپیش چیلنجز کے تناظر میں ایس آئی ایف سی کے ذریعے خاطر خواہ کاوشوں پر زور دیا۔

اعلامیہ کے مطابق کمیٹی نے پالیسیوں کے تسلسل کے عزم کا اعادہ کیا، کمیٹی نے ملک کے وسیع تر مفاد میں مشکل معاشی فیصلے کرنے کا عزم کیا۔

اعلامیہ میں بتایا گیا ہے کہ سابق نگران وزیراعظم نے وزیراعظم شہباز شریف اور کابینہ اراکین کو ذمہ داریاں سنبھالنے پر مبارکباد دی۔

اعلامیہ میں مزید کہا گیا ہے کہ آرمی چیف جنرل عاصم منیر نے افواج پاکستان کی جانب سے معاشی بحالی کے اقدامات کی مکمل حمایت کی یقین دہانی کرائی ہے جب کہ وزیراعظم نے کابینہ اراکین کو ملک کے وسیع تر مفاد میں سیاسی اختلافات کو بالائے طاق رکھنے کی تلقین کی۔