پی ٹی آئی کور کمیٹی اجلاس کی اندرونی کہانی کا بول نے پتہ لگا لیا ہے۔

تفصیلات کے مطابق پی ٹی آئی کور کمیٹی اجلاس ہنگامہ آرائی کا شکار رہا اور دوران اجلاس کور کمیٹی اراکین ایک دوسرے کے خلاف تنقید کے نشتر چلاتے رہے۔

اجلاس میں شیرافضل اور نیاز اللہ نیازی کے درمیان شدید تلخ کلامی ہوئی اور بات دھمکیوں تک جا پہنچی۔

پی ٹی آئی رہنما فردوس شمیم نے اظہار خیال کرتے ہوئے کہا کہ شیرافضل مروت کو کوئی استاد لگانا چاہیے۔

انہوں نے کہا کہ شیرافضل مروت کےساتھ کسی سمجھ دار کو ہونا چاہیے جو اسے پڑھائے سمجھائے، اپنے ہی لوگوں پر شیرافضل مروت اٹیک کر رہے ہیں۔

شیر افضل مروت نے کہا کہ میرے خلاف مہم چلائی جا رہی ہے، کوئی باہر نکلتا نہیں ہے سب چھپے ہوئے ہیں۔

شیر افضل مروت کا کہنا تھا کہ میں نے پی ٹی آئی کو فرنٹ سے لیڈ کیا ہے اور میرے خلاف ہی اپنےاراکین باتیں کرتے ہیں۔

کور کمیٹی کے اجلاس میں شرکاء نے کہا کہ شیر افضل مروت مینڈیٹ سے ہٹ کر بات کرتے ہیں، 2 ماہ میں پی ٹی آئی کا بیانیہ بنتا ہے لیکن شیر افضل مروت ختم کر دیتے ہیں۔

اجلاس میں ‏شیر افضل مروت کو روکنے کی کوشش میں نیاز اللہ نیازی سے تلخ کلامی بھی ہوئی اور سخت جملوں کا تبادلہ بھی ہوا۔

شیر افضل مروت نے نیاز اللہ نیازی کو کہا کہ باہرآؤ تمہیں میں بتاتا ہوں، جس پر نیاز اللہ نیازی نے کہا کہ آ جاؤ باہر، مھے شعیب شاہین مت سمجھنا۔

شیر افضل مروت اور نیاز اللہ نیازی کی جھڑپ کو کور کمیٹی کے اجلاس میں موجود علی محمد خان، نعیم پنجوتھا اور بیرسٹرگوہروغیرہ نے رکوایا اور معاملہ رفع دفع کرایا۔