شانگلہ کے علاقے بشام کے قریب خودکش دھماکے میں غیرملکیوں سمیت چھ افراد ہلاک ہوگئے۔ 

پولیس ذرائع کے مطابق بشام کے قریب خودکش دھماکہ ہوا جس کے نتیجے میں پانچ غیرملکی باشندوں سسمیت 6 افراد ہلاک ہوئے۔

پولیس ذرائع کا کہنا ہے کہ سامنے سے آنے والی موٹرکارغیرملکیوں کی گاڑی سے ٹکرا گئی۔ موٹرکارٹکرانے کے بعد دھماکہ ہوا۔

دھماکے کے بعد گاڑی کے ٹکڑے سڑک پر جگہ جگہ بکھرگئے۔ امدادی ٹیمیں اوربم ڈسپوزل اسکواڈ کا عملہ بھی موقع پرپہنچ گیا، پولیس اور دیگر تحقیقاتی اداروں کی جانب سے واقعے کے شواہد اکٹھے کیے جا رہے ہیں۔

عینی شاہدین کا کہنا ہے کہ خودکش حملہ آورنے گاڑی ٹکرائی جس کے بعد زوردار دھماکہ ہوا ہے۔

واقعے کے بعد سیکیورٹی فورسز نے علاقے کو گھیرے میں لے لیا، دھماکے کے نتیجے میں مرنے والوں کی لاشیں اسپتال منتقل کر دی گئی ہیں۔

صدرآصف زرداری نے بشام میں غیرملکی باشندوں پرحملےکی مذمت کی ہے، حملے میں غیرملکی باشندوں کی ہلاکت پررنج وغم اورجاں بحق غیرملکی باشندوں کے اہلخانہ اورحکومت سےاظہارتعزیت کیا۔

وفاقی وزیر داخلہ محسن نقوی نے شانگلہ میں چینی شہریوں کی گاڑی پر خودکش حملے کی شدید مذمت کی اورجاں بحق چینی شہریوں کے خاندانوں سے دلی ہمدردی و اظہار تعزیت کرتے ہوئے کہا کہ جاں بحق چینی شہریوں کے لواحقین سے مکمل یکجہتی کا اظہار کرتے ہیں۔

محسن نقوی نے کہا کہ دکھ کی گھڑی میں چین کی حکومت اور جاں بحق شہریوں کے خاندانوں کے ساتھ ہیں۔ چینی شہریوں پر حملے کی جتنی بھی مذمت کی جائے کم ہے۔ دشمن نے پاکستان کے انتہائی قابل اعتماد دوست ملک کے شہریوں کو نشانہ بنایا۔

وفاقی وزیرداخلہ نے کہا کہ یہ حملہ چینی شہریوں پرنہیں بلکہ پاکستان پرہے۔ دشمن کو اس حملے کا سخت جواب دیا جائے گا۔

چیئرمین پاکستان پیپلزپارٹی بلاول بھٹو زرداری نے بھی بشام میں دہشتگردی کی مذمت کی اورخودکش حملے میں چینی باشندوں کی ہلاکت پر اظہار افسوس کیا۔