ففتھ جنریشن فائٹرجیٹ کی دوڑمیں بھارتی فضائیہ پاک فضائیہ سے کئی برس پیچھے رہ گئی۔

بھارتی حکومت نے بالاخر ففتھ جنریشن ایڈوانسڈ میڈئیم کومبیٹ ائیرکرافٹ پراجیکٹ کی منظوری دے دی۔ بھارت کی مرکزی کابینہ کی سیکیورٹی کمیٹی نے پراجیکٹ کی منظوری دی۔

پاکستان کی طرف سے جے 31 اسٹیلتھ فائٹر جیٹ کے حصول کے اعلان کے بعد بھارتی فضائیہ شدید دبائو کا شکار تھی۔ پاکستان اور ترکی کا ففتھ جنریشن ٹی ایف ایکس پروگرام بھی طے شدہ ٹائم لائن کے تحت بڑھ رہا ہے۔

ذرائع کے مطابق پاک فضائیہ میں جے 31 طیارے مستقبل قریب میں شامل ہوں گے، پاک فضائیہ کی جانب سے پہلے ففتھ جنریشن فائٹر جیٹ کو بیڑے میں شامل کرنے کی تیاریاں جاری ہیں۔

بھارتی حکومت کی جانب سے ایڈوانسڈ میڈئیم کومبیٹ ائیرکرافٹ پراجیکٹ کے لئے 1 کھرب 50 ارب مختص کئے جائیں گے۔

 بھارت کی ڈیفنس ریسرچ اینڈ ڈیویلپمنٹ آرگنائزیشن کے ایروناٹیکل ڈیپارٹمنٹ کو جدید ففتھ جنریشن تیارہ طیارہ تیار کرنے کی ذمہ داری دی جائے گی۔

بھارتی ففتھ جنریشن طیارے کا پہلا پروٹوٹائپ کم از کم 4 برس بعد تیار ہوگا۔ بھارتی ایڈوانسڈ میڈیم کومبیٹ ایئرکرافٹ کے پہلے پروٹوٹائپ کو پرواز کرنے میں مزید ایک برس لگے گا۔

بھارتی ٹائم لائنزکے مطابق ایڈوانس میڈیم کمبیٹ ایئر کرافٹ اگلے 5 برس سے پہلے پروازنہیں کر سکتا۔

بھارتی دفاعی ذرائع کے مطابق ہندوستان ایروناٹکس لمٹیڈ کو ففتھ جنریشن طیارے کی پروڈکشن میں 9 سے 10 سال لگیں گے۔ بھارتی فضائیہ 2035 سے پہلے باضابطہ طور پر ففتھ جنریشن طیارہ بیڑے میں شامل نہیں کرسکتی۔

ذرائع کا کہنا ہے کہ بھارتی فضائیہ کے برعکس پاکستان ایئر فورس نے ترکی کے ساتھ ٹی ایف ایکس جوائنٹ وینچر کے لیے بھی 2030 کی ڈیڈ لائن طے کررکھی ہے، 2030 سے پہلے ہی پاکستان مستقبل قریب میں چینی جے31 طیارے بھی حاصل کرے گا۔

ذرائع کے مطابق بھارت کے مقابلے میں پاکستان ایئر فورس پانچ سے آٹھ برس پہلے ہی ففتھ جنریشن فائٹر جیٹ آپریٹ کرے گی۔ اپنا ففتھ جنریشن فائٹر جیٹ بنانے کے علاوہ بھارت کے پاس امریکہ اور روس کے دو آپشنز بھی بظاہرموجود ہیں۔

بھارت روسی ففتھ جنریشن فائٹر جیٹ پروگرام سے خود کو الگ کر چکا ہے۔ فی الحال روس کی مشکلات کو مدنظر رکھتے ہوئے بھارت کو ماسکو سے ففتھ جنریشن فائٹر جیٹ ملنا مشکل ہے۔ امریکہ کی جانب سے بھی بھارت کو ففتھ جنریشن فائٹر جیٹ دینے کے امکانات کافی کم ہیں۔