ریاض: مکہ مکرمہ میں وحدت اسلام عالمی کانفرنس کا آج دوسرا روز ہے۔

حرمین شریفین انتظامی امور کے سربراہ الشیخ عبدالرحمن السدیس نے مکہ مکرمہ میں وحدت اسلام عالمی کانفرنس کے دوسرے روز شرکت کی جب کہ اسلامی ممالک کے دیگر آئمہ کرام سمیت اسکالرز نے شرکت کی۔

عبدالرحمان السدیس نے کہا کہ مکاتب فکر کے مابین ہم آہنگی کے لیے کانفرنس انتہائی اہمیت کی حامل ہے، کانفرنس نے فرقہ وارانہ اور انتہا پسندی کی بنیاد پر کی جانے والی تقاریر اور نعروں کا مقابلہ کرنے کے لیے روڈ میپ کا تعین کیا ہے۔

عبدالرحمان السدیس کہتے ہیں کہ ہماری کوشش ہے کہ تصادم کو ہوا دینے والوں کا سد باب ہو تاکہ اسلامی اخوت و اقدار کو نقصان پہنچانے سے روکا جاسکے۔

حرمین شریفین انتظامی امور کے سربراہ کہتے ہیں کہ ممالک کے مابین تناؤ نہیں بلکہ معاشرتی امن و استحکام کا حصول عدل و انصاف کے قیام سے ممکن ہوتا ہے۔

ان کا کہنا تھا کہ شاہ سلمان بن عبدالعزیز کی زیر سرپرستی ہونے والی بین الاقوامی کانفرنس کا مقصد مختلف اسلامی مکاتب فکر اورفرقوں میں باہمی افہام و تفہیم پیدا کرنا اور تعاون کو فروغ دینا ہے۔

انہوں نے مزید کہا کہ میانہ روی اور اعتدال کو فروغ دینے اور غلط فہمیوں کو حتم کرنے کے لیے میڈیا کے مثبت کردار سے انکار نہیں کیا جاسکتا جو انتہائی اہم ہے۔