ڈونلڈ ٹرمپ کے وکلاء نے عدالت میں درخواست جمع کرائی ہے کہ ان کے موکل ڈونلڈ ٹرمپ جرمانے کی خطیر رقم جمع نہیں کرا سکتے۔

سابق امریکی صدر ڈونلڈ ٹرمپ کے وکلا نے نیویارک کی اپیلیٹ کورٹ کو بتایا ہے کہ ان کے لیے 45 کروڑ 40 لاکھ ڈالر کے سول فراڈ کے فیصلے کی پوری رقم پر مشتمل بانڈ جمع کرانا نا ممکن ہے۔

سابق امریکی صدر نیویارک کے ایک فیصلے کے خلاف اپیل کر رہے ہیں کہ انہوں نے قرض دہندگان اور انشورنس کمپنیوں کو دھوکہ دینے کے لیے اپنی دولت میں اضافہ کیا۔

وکیلوں نے پیر کے روز عدالت میں ایک فائلنگ میں لکھا کہ فیصلے کی پوری رقم میں اپیل بانڈ حاصل کرنا پیش کردہ حالات میں ممکن نہیں ہے۔

صدر کے لیے ممکنہ ریپبلکن امیدوار ٹرمپ پر 45 کروڑ 68 لاکھ ڈالر واجب الادا ہیں۔ مجموعی طور پر وہ اور ان کے شریک مدعا علیہان بشمول ان کی کمپنی اور اعلیٰ عہدیداروں پر 46 کروڑ 73 لاکھ ڈالر واجب الادا ہیں۔

ٹرمپ کے وکلاء کا کہنا ہے کہ بانڈ حاصل کرنے کے لیے انہیں 55 کروڑ 70 لاکھ ڈالر کی ضمانت دینا ہوگی۔

ریاست کی اپیل کورٹ کے جج نے گزشتہ ماہ فیصلہ سنایا تھا کہ ٹرمپ کو 25 مارچ سے شروع ہونے والے فیصلے پر عمل درآمد روکنے کے لیے پوری رقم پر مشتمل بانڈ جمع کرانا ہوگا۔