قومی ٹیم کے سابق ہیڈ کوچ مصباح الحق نے ٹی ٹوئنٹی ورلڈکپ کے لیے پاکستان کا ممکنہ مڈل آرڈر اور اوپننگ جوڑی بتادی۔

مقامی اسپورٹس چینل پر بات کرتے ہوئے پاکستان کے سابق ہیڈ کوچ مصباح الحق نے ٹی ٹوئنٹی ورلڈکپ کے لیے پاکستان کا ممکنہ مڈل آرڈر اور اوپننگ جوڑی بتائی جو کہ قومی ٹیم کو مزید مضبوط کرسکتی ہے۔

انہوں نے کہا ’’ممکنہ طور پر مڈل آرڈر میں جن کھلاڑیوں کو میں دیکھ رہا ہوں وہ بالکل واضح ہیں جب کہ ان میں آغا سلمان، اعظم خان، افتخار احمد اور شاداب خان شامل ہیں جب کہ فخرزمان کے بارے میں بھی سوچ سکتے ہیں‘‘۔

علاوہ ازیں مصباح الحق نے پاکستان کے ٹاپ آرڈر پر بھی روشنی ڈالی جن میں بابر اعظم، محمد رضوان اور صائم ایوب شامل ہیں۔

ان کا کہنا تھا ’’میرے خیال میں بابر، رضوان اور صائم میں سے صائم ایوب سب سے اوپر ہیں جس کے بعد آپ کو تیسرے نمبر پر بابر کو رکھنا چاہیے یا پھر انہیں صائم کے ساتھ اوپننگ کروانا چاہیے‘‘۔

مصباح الحق کہتے ہیں ’’اگر بابر اور صائم سے اوپننگ کرواتے ہیں تو پھر رضوان کو تیسرے نمبر پر رکھنا چاہیے لیکن صائم کو ہی اوپنر رکھنا چاہیے کیونکہ آپ کو دائیں اور بائیں ہاتھ کے امتزاج کی ضرورت ہے‘‘۔

واضح رہے کہ ٹی ٹوئنٹی ورلڈکپ کا آغاز یکم جون 2024 سے امریکہ اور ویسٹ انڈیز کی میزبانی میں ہونے جارہا ہے جس میں پاک بھارت ٹاکرا 9 جون کو نیویارک میں متوقع ہے۔