ملک میں غیر قانونی سرگرمیوں کی روک تھام کے حوالے سے اجلاس منعقد کیا گیا جس کی صدارت وزیر اعظم نے کی۔

تفصیلات کے مطابق وزیر اعظم شہباز شریف کی زیر صدارت غیر قانونی سرگرمیوں کی روک تھام کے حوالے سے اجلاس منعقد کی گیا جس میں آرمی چیف جنرل عاصم منیر،وفاقی وزراء اور صوبائی وزرائےاعلیٰ نے شرکت کی۔

اجلاس میں ملک میں غیرقانونی سرگرمیوں اورجرائم پیشہ مافیازکےتدارک پرغور کیا گیا۔

اجلاس میں اسمگلنگ، ذخیرہ اندوزی، منی لانڈرنگ، بجلی چوری کےخلاف  اقدامات اور غیرقانونی غیرملکیوں کی واپسی سے متعلق بریفنگ دی گئی۔

اجلاس کے شرکا نے اقدامات کی اہمیت اور ملکی معیشت پران کے مثبت اثرات کا ادراک کیا، اور ملکی معیشت کو متاثر کرنے والے اسمگلرز، ذخیرہ اندوزوں کے خلاف کارروائی کاعزم کیا گیا۔

اجلاس میں وفاقی اورصوبائی حکومتوں کےدرمیان معاہدوں کی منظوری دی گئی، وفاق اور صوبوں کے درمیان انسداد بجلی چوری پالیسی کے معاہدے ہوں گے۔

اجلاس میں تقسیم کار کمپنیوں کی تنظیم نو اور اسمارٹ میٹرز کی تنصیب کے معاہدوں پر اتفاق کیا گیا، کرپٹ افسران کے خلاف سخت کارروائی سے متعلق معاہدے بھی ہوں گے۔

اجلاس میں آرمی چیف جنرل عاصم منیر نے معیشت کی بحالی کے لیےفوج کی جانب سے حکومتی اقدامات کی حمایت کا عزم کیا۔

وزیراعظم شہباز شریف نے اجلاس میں طے شدہ اہداف اوراقدامات پر مقررہ وقت میں عملدرآمد یقینی بنانے کی ہدایت کی۔