افغانستان میں گزشتہ 3 روز سے جاری شدید بارشوں اور سیلاب کے نتیجے میں درجنوں افراد ہلاک ہو گئے ہیں۔

تفصیلات کے مطابق افغانستان میں تین روز سے جاری شدید بارشوں اور سیلاب کے نتیجے میں کم از کم 33 افراد ہلاک ہو گئے ہیں۔ حکام کا کہنا ہے کہ زیادہ تر ہلاکتیں چھتیں گرنے سے ہوئی ہیں جبکہ تقریبا 600 گھروں کو نقصان پہنچا ہے یا تباہ ہو گئے ہیں۔

محکمہ موسمیات کے ترجمان جانان سیق نے بتایا کہ جمعہ کے روز سے بارشوں کی وجہ سے اچانک سیلاب آیا جس سے بڑے پیمانے پر جانی و مالی نقصان ہوا۔

انہوں نے کہا کہ ابتدائی معلومات سے پتہ چلتا ہے کہ بدقسمتی سے سیلاب میں 33 افراد ہلاک اور 27 زخمی ہوئے۔

ترجمان نے مزید کہا کہ اس کے علاوہ، 200 مویشی ہلاک ہوگئے ہیں، تقریبا 600 کلومیٹر (370 میل) سڑک تباہ ہوگئی ہے، اور تقریبا 800 ہیکٹر (1،975 ایکڑ) زرعی زمین سیلاب کا شکار ہو گئی ہے۔

ملک کے 34 میں سے 20 صوبوں میں شدید بارشیں ہوئیں، جس کے بعد موسم سرما غیر معمولی طور پر خشک ہو گیا جس کی وجہ سے زمین خشک ہو گئی اور کسانوں کو پودے لگانے میں تاخیر کرنے پر مجبور ہونا پڑا۔

انہوں نے کہا کہ مغربی فراہ، ہرات، جنوبی زابل اور قندھار ان صوبوں میں شامل ہیں جنہیں سب سے زیادہ نقصان پہنچا ہے۔

حکام نے خبردار کیا ہے کہ آنے والے دنوں میں افغانستان کے بیشتر صوبوں میں مزید بارشوں کا امکان ہے۔

اقوام متحدہ نے گزشتہ سال خبردار کیا تھا کہ ‘افغانستان شدید موسمی حالات میں بڑے جھٹکوں کا سامنا کر رہا ہے۔’