جمعیت علمائے اسلام نے اپنے سابق رہنما طلحہ محمود کے سینیٹ الیکشن لڑنے پر اعتراض عائد کردیا۔

تفصیلات کے مطابق جے یو آئی کی رہنما ریحانہ اسماعیل نے کہا ہے کہ سابق سینیٹر طلحہ محمود کو اس بار بھی سینٹ انتخابات کے لیے ٹکٹ جاری کیا تھا۔

پارٹی کی مرکزی قیادت کی جانب سے انہیں سینیٹ انتخابات کے کاغذات واپس لینے کا کہا گیا تھا تاہم انہوں ںے فیصلے پر عمل نہیں کیا اور جے یو آئی چھوڑ کر دوسری جماعت میں شمولیت اختیار کرلی۔

ریحانہ اسماعیل کے مطابق طلحہ محمود کے کاغذات پر بحیثیت تائید کنندہ ریٹرننگ آفیسر کے پاس اعتراض جمع کرادیا ہے، طلحہ محمود اب صادق اور امین نہیں رہے ان کے کاغذات مسترد کیے جائیں۔

سینیٹر طلحہ محمود نے اسلام آباد میں پیپلز پارٹی کے رہنماؤں فیصل کریم کنڈی و دیگر کے ہمراہ پریس کانفرنس کے ذریعے با ضابطہ اعلان کرتے ہوئے جمعیت علمائے اسلام چھوڑنے کا اعلان کیا۔

انہوں نے کہا کہ میں جے یو آئی سے پہلے کسی جماعت میں نہیں رہا، میں نے جے یو آئی میں شمولیت اختیار کی اور میں سمجھتا ہوں ملک کے حالات نازک ہیں۔ آج ملک کے ادارے اسٹیبلشمنٹ عدلیہ سمیت سب نازک دور سے گزر رہے ہیں۔ ملک کے مشکل حالات میں اداروں کو مضبوط کرنا ضروری ہے۔