کراچی: وزیر اعلیٰ سندھ نے عیدالفطر کے پیش نظر پولیس کو آج اور کل سخت سیکیورٹی اور نگرانی بڑھانے کی ہدایت کردی۔

وزیراعلیٰ سندھ سید مراد علی شاہ کی زیر صدارت شہر کراچی میں امن امان کی صورت حال پر اہم اجلاس ہوا جس میں ایڈیشنل آئی جی کراچی عمران یعقوب، ڈی آئی جی مقدس حیدر، ایس ایس پی اے وی سی سی ظفر صدیقی، ڈی ایس پی قیصر شاہ، انسپیکٹر عابد حسین، سب انسپیکٹر غلام رسول، ہیڈ کانسٹیبل طارق صمد، خاور یوسف، لیڈی پولیس کانسٹیبل عریشا ناز اور دیگر پولیس افسراں شریک ہوئے۔

وزیراعلیٰ سندھ نے کراچی پولیس کو ہدایت کی کہ شہر بھر میں آج اور کل سخت سیکیورٹی اور نگرانی کو بڑھائیں، میں چاہتا ہوں ہر لحاظ سے عوام کی جان و مال کی حفاظت کو یقینی بنایا جائے۔

وزیراعلیٰ سندھ نے بلدیہ میں چھاپہ مار کر دو مغویوں کی بازیابی پر پولیس کو شاباس دی، پولیس پارٹی میں ڈی آئی جی مقدس حیدر، ایس ایس پی ظفر صدیقی، ڈی ایس پی قیصر شاہ، انسپیکٹر عابد حسین، سب انسپیکٹر غلام رسول، ہیڈ کانسٹیبل طارق صمد، خاور یوسف، لیڈی پولیس کانسٹیبل عریشا ناز شامل تھی۔

ایڈیشنل آئی جی کراچی نے بریفنگ میں بتایا کہ پولیس نے بلدیہ میں چھاپا مار کرعبداللہ اور شاہد کو کل بازیاب کروایا، پولیس نے صابر عنایت رحمان، حیات علی اور وحید اللہ کو زخمی حالات میں گرفتار کیا۔

ایڈیشنل آئی جی کراچی نے کہا کہ مقدمے کے مطابق اغوا کاروں نے شاہد اور عبداللہ کو اٹلی بھیجنے کے بہانے بلایا اور اغوا کیا، اغوا کے بعد نوید اختر نے کال کر کے تاوان کا مطالبہ کیا جب کہ پولیس نے کارروائی کرکے مغویوں کو بازیاب کروایا۔

ایڈیشنل آئی جی کراچی نے بتایا کہ یہ اغوا کاروں کا گروپ ملک سے باہر بیٹھ کر کراچی میں اغوا برائے تاوان میں ملوث ہے، وہ گروپ اصل میں پاکستانی ہے لیکن باہر بیٹھ کر کراچی میں کرائم کرواتے ہیں، ہم نے گروپ کی شناخت کی ہے اور جلد ان کو گرفتار کریں گے۔

سید مراد علی شاہ کا کہنا تھا کہ پولیس اس طرح کے بہترین کام کرے گی تو کرائم ختم ہوگا، وزیراعلیٰ سندھ نے کراچی پولیس کے سربراہ کو کہا کہ وہ پولیس کو ان کی طرف سے ہمت افزائی کریں۔

وزیراعلیٰ سندھ کہتے ہیں کہ میں خود بھی جلد پولیس اہلکاروں سے ملاقات کروں گا، کراچی پولیس ایک اچھی فورس ہے۔ کراچی میں روزانہ 166 مقدمات ہوتے ہیں جو ملک کے دیگر بڑے شہروں سے کم ہیں اور مجھے امید ہے کراچی پولیس بہترین کام کرکے جرائم کا خاتمہ کرے گی۔