سندھ حکومت نے منشیات فروشوں کے قلع قمع کے لیے کمر کس لی ہے۔

تفصیلات کے مطابق سندھ حکومت نے صوبے بھر میں منشیات فروشوں کے خلاف گھیرا تنگ کرنے کی تیاریاں شروع کر دی ہیں۔

اس حوالے سے شہباز بلڈنگ حیدرآباد میں سینئر صوبائی وزیر شرجیل میمن کی زیر صدارت ایک اعلیٰ سطح کا ہنگامی اجلاس منعقد کیا گیا، جس میں پولیس، ایکسائز اور دیگر محمکوں کے اعلیٰ افسران نے شرکت کی۔

اجلاس میں صوبائی وزیر نے کہا کہ نوجوان نسل کو بچانے کے لیے منشیات کا خاتمہ کرنا ہو گا۔ اور منشیات فروشوں کے خلاف کارروائیوں سے متعلق سیکرٹری اطلاعات کو بھی آگاہ کریں تاکہ میڈیا پر ان کی تشہیر کر کے منشیات فروشوں کی حوصلہ شکنی کی جا سکے۔

شرجیل انعام میمن نے کہا کہ چند روز میں صورتحال میں بہتری نظر آنی چاہیے کیونکہ  یہ ہمارے بچوں کے مستقبل کا سوال ہے۔

شرجیل میمن نے ڈی آئی جی حیدرآباد طارق دھاریجو کو ہدایت کی کہ نوجوان نسل کو منشیات کی لت لگانے والوں کے خلاف ایکسائز اور پولیس مشترکہ کارروائیاں کریں۔

ان کا کہنا تھا کہ تعلیمی اداروں میں آئس و دیگر منشیات کا بڑھتا ہوا رجحان تشویشناک ہے.

منشیات کے سدباب کے لیے ہونے والے اجلاس میں منشیات فروشوں اور منشیات کی اسمگلنگ کی خفیہ اطلاع کے لیے فون نمبرز کے اشتہار جاری کرنے کا فیصلہ کیا گیا۔

صوبائی وزیر نے متعلقہ افسران کو واٹس ایپ گروپ بنا کر اپنی روز مرہ کی کارکردگی اور معلومات شیئر  کرنے کی ہدایت کی۔

صوبائی وزیر نے کہا کہ منشیات فروشوں سے تفتیش کر کے بڑے اسمگلرز پکڑ کر سپلائی چین کو توڑا جائے۔

سینئر صوبائی وزیر شرجیل انعام میمن نے سیکریٹری ایکسائز کو ہدایت کی کہ اچھی شہرت کے حامل افسران کو منشیات آپریشن ٹاسک فورس میں شامل کیا جائے.

 اجلاس میں ڈی آئی جی حیدرآباد طارق دھاریجو نے منشیات فروشوں کے خلاف کارروائیوں سے متعلق بھی اجلاس کو آگاہ کیا.