پاکستان نے دوسرا ٹی ٹوئنٹی جیت کر سیریز میں ایک صفر کی برتری حاصل کر لی۔

تفصیلات کے مطابق راولپنڈی کرکٹ اسٹیڈیم میں نیوزی لینڈ نے پہلے بیٹنگ کرتے ہوئے 90 رنز بنائے تھے پاکستان نے مطلوبہ ہدف 3 وکٹوں کے نقصان پر 7.5 اوورز پہلے ہی حاصل کر لیا۔

پاکستان کی جانب سے رضوان کی شاندار بلے بازی کی انہوں نے 45 رنز کی ناقابل شکست اننگ کھیلی۔

عرفان خان 18 رنز بنا کر دوسرے ناٹ آؤٹ بیٹر تھے۔

 بابر اعظم 14عثمان خان 7 جبکہ صائم ایوب 4 رنز بنا کر آؤٹ ہوئے۔

نیوزی لینڈ کی جانب سے بن لسٹر، مچل ڈفی اور سوڈھی نے ایک ایک وکٹ حاصل کی۔

اس سے قبل پاکستان نے ٹاس جیت کر مہمان ٹیم نیوزی لیند کو پہلے بیٹنگ کی دعوت دی، کیوی ٹیم پاکستانی بولرز کی تباہ کن بولنگ کی سبب 18.1 اوورز میں 90 رنز پر ڈھیر ہو گئی۔

نیوزی لینڈ کی جانب سے مارک چیپمین 19رنز بنا کر نمایاں بلے باز تھے۔ کول میکونی نے 15 اور ڈین فوکسکرافٹ نے 13رنز بنائے۔

نیوزی لینڈ کے سات بلے باز ڈبل فیگر میں داخل نہ ہو سکے۔

پاکستان کی جانب سے شاہین شاہ آفریدی نے 3 وکٹیں حاصل کیں، جبکہ محمد عامر، شاداب خان اور ابرار احمد نے 2،2 کھلاڑیوں کو آؤٹ کیا جبکہ نسیم شاہ ایک وکٹ حاصل کر سکے۔

پاکستان نے 5 ٹی ٹوئنٹی میچز کی سیریز میں ایک صفر کی برتری حاصل کر لی ہے۔

پنڈی اسٹیڈیم میں پاکستان کرکٹ بورڈ کے ناقص انتظامات دیکھنے کو ملے، میڈیا باکس میں انٹرنیٹ کی سہولت ناپید ہے جب کہ جیمرز کی وجہ سے میڈیا باکس میں موبائل فون کی سروس بھی متاثر رہی۔

پی سی بی کی جانب سے معاونتی عملہ بھی غائب ہے جب کہ صحافیوں کو خبروں کی ترسیل میں مشکلات کا سامنا کرنا پڑا۔

پاکستان الیون

کپتان بابر اعظم، محمد رضوان (وکٹ کیپر)، صائم ایوب، عثمان خان، افتخار احمد، محمد عرفان خان، شاداب خان، شاہین شاہ آفریدی، نسیم شاہ، محمد عامر اور ابرار احمد۔

نیوزی لینڈ الیون

کپتان مائیکل بریسویل، ٹم سیفرٹ (وکٹ کیپر)، مارک چیپ مین، جیکب ڈفی، ڈین فاکس کرافٹ، بین لِسٹر، کول میک کونچی، جیمز نیشم، ٹم رابنسن، بین سیئرز اور ایش سودھی۔