سعودی ولی عہد شہزادہ محمد بن سلمان بن عبدالعزیز سے وزیراعظم شہباز شریف کی ملاقات کے بعد مشترکہ اعلامیہ جاری کردیا گیا۔

اعلامیے میں کہا گیا کہ شہزادہ محمد بن سلمان سے شہبازشریف نے الصفا پیلس مکہ المکرمہ میں باضابطہ ملاقات کی، سعودی ولی عہد نے وزیراعظم کو منصب سنبھالنے پر مبارکباد دی اور نیک خواہشات کا اظہار کیا۔

اعلامیے کے مطابق وزیراعظم نے سعودی عرب کی غیر متزلزل حمایت اور مہمان نوازی پر سعودی ولی عہد کا شکریہ ادا کیا۔  وزیراعظم نے دوطرفہ تعلقات اور اقتصادی تعاون کو فروغ دینے کے لیے پاکستان کے عزم کا اعادہ کیا۔

مشترکہ اعلامیے میں کہا گیا کہ ملاقات میں ہونے والی بات چیت کا محور دونوں ممالک کے درمیان برادرانہ تعلقات کو مزید مضبوط بنانے اورمختلف شعبوں میں تعاون کو بڑھانے کے راستے تلاش کرنا تھا۔

ملاقات میں پاکستان کی معیشت میں سعودی عرب کے تعاون کو سراہا گیا اوردونوں ممالک کے درمیان کاروبار اور سرمایہ کاری کے حوالے سے تعاون بڑھانے کے باہمی عزم کا اظہارکیا گیا۔

ملاقات میں دونوں رہنماؤں نے پاکستان میں 5 ارب ڈالر مالیت کے نئے سعودی سرمایہ کاری پیکج کے پہلے فیز کو جلد از جلد پایہ تکمیل تک پہنچانے کے عزم کا اعادہ کیا۔ دونوں رہنماؤں نے غزہ کی تشویشناک صورتحال سمیت باہمی دلچسپی کی علاقائی اورعالمی پیش رفت پر بھی تبادلہ خیال کیا۔

ملاقات میں غزہ میں اسرائیلی فوجی کارروائیوں کو روکنے اورانسانی جانی نقصان کو کم کرنے کے لیے بین الاقوامی کوششوں پر زور دیا گیا اور اس بات پر اتفاق کیا گیا کہ بین الاقوامی برادری اسرائیل پر دباؤ بڑھائے تا کہ وہ اپنے غیر قانونی اقدامات سے بازآئے۔

دونوں رہنماؤں نے غزہ تک بلا روک ٹوک انسانی امداد کی رسائی کی ضرورت پر زور دیا۔ ملاقات میں سلامتی کونسل اور جنرل اسمبلی کی متعلقہ قراردادوں کے ساتھ ساتھ عرب امن اقدام کے عمل کو آگے بڑھانے کی ضرورت پر بھی تبادلہ خیال کیا گیا۔

اعلامیے میں کہا گیا کہ ایک آزاد فلسطینی ریاست، جس کا دارالحکومت مشرقی یروشلم ہو کے قیام کے لیے ایک منصفانہ اور جامع حل تلاش کرنا ہے۔

ملاقات میں خطے میں امن و استحکام کو یقینی بنانے کے لیے پاکستان اور بھارت کے درمیان تنازعات کہ حل کے لیے بات چیت پر زوردیا گیا۔ بالخصوص جموں و کشمیر کے تنازع کو حل کرنے کے لیے دونوں ممالک کے درمیان بات چیت کی اہمیت پر زوردیا گیا۔

وزیراعظم شہبازشریف نے سعودی ولی عہد کو جلد از جلد پاکستان کا سرکاری دورہ کرنے کی دعوت دی، سعودی ولی عہد نے دورے کی دعوت قبول کرلی۔

یہ خبر بھی پڑھیں؛ وزیراعظم شہباز شریف کیلئے خانہ کعبہ کا دروازہ کھول دیا گیا