اسلام آباد: صدر آصف علی زرداری سے سعودی وزیر خارجہ کی ایوان صدر میں ملاقات۔

صدر مملکت آصف علی زرداری سے سعودی وزیر خارجہ نے ایوان صدر میں ملاقات جس میں پاکستان اورسعودی عرب نے اقتصادی تعاون مزید فروغ دینے کے عزم کا اعادہ کیا۔

صدرمملکت آصف علی زرداری کا کہنا تھا کہ پاکستان اورسعودی عرب کے درمیان دیرینہ تعلقات ہیں، موجودہ تعلقات کواقتصادی شراکت داری میں بدلنا چاہتا ہیں۔ پاکستانی حکومت اورعوام خادمین حرمین شریفین کے لئے احترام کے جذبات رکھتے ہیں۔

انہوں نے کہا کہ پاکستان سعودی عرب کے ساتھ کھڑا رہے گا، اسلامی دنیا کی خوشحالی سعودی عرب کی ترقی سے وابستہ ہے جب کہ صدر نے سعودی ولی عہد کی دوراندیش قیادت کی قابل ذکر پیشرفت کو سراہا۔

سعودی وزیر خارجہ نے کہا کہ سعودی عرب پاکستان کے ساتھ تعلقات کو اہمیت دیتا ہے، پاکستان سےمضبوط شراکت داری قائم کرنےکے لئے پرعزم ہیں جب کہ پاکستان اور سعودی عرب کے مابین مضبوط تعلقات ہیں۔

ان کا کہنا تھا کہ دونوں ممالک ایک دوسرے کی مدد کرتے آئے ہیں جب کہ سعودی وزیرخارجہ نے پاکستانی تارکین وطن کےکردار کو بھی سراہا۔

علاوہ ازیں ملاقات میں علاقائی صورتحال، مشرق وسطیٰ میں حالیہ پیش رفت پربھی تبادلہ خیال کیا گیا جب کہ دونوں ممالک نے غزہ میں اسرائیلی مظالم کو بند کرنے پر زور دیا۔

فریقین نے امت مسلمہ کو درپیش چیلنجز پر بھی تبادلہ خیال کیا اور صدرمملکت نے خادمین حرمین شریفین کے لئے نیک خواہشات کا بھی اظہارکیا۔