پاکستان اور نیوزی لینڈ کے مابین ٹی ٹونٹی کرکٹ سیریز کا چوتھے میچ کے لیے پولیس نے حکمت عملی تیار کر لی ہے۔

تفصیلات کے مطابق پاکستان اور نیوزی لینڈ کے مابین ٹی ٹوئنٹی سیریز کے بقیہ دو میچز کے لیے آئی جی پنجاب ڈاکٹر عثمان انور نے کھلاڑیوں، میچ آفیشلز، شائقین کرکٹ کو بھرپور سیکیورٹی فراہم کرنے کی ہدایت کی ہے۔

 آئی جی پنجاب کا کہنا تھا کہ پنجاب پولیس نے میچز سیکیورٹی کیلئے پہلے سے بہتر حکمت عملی تیار کی۔

انہوں نے کہا کہ پاکستان کرکٹ بورڈ، ضلعی انتظامیہ، سکیورٹی ایجنسیز سمیت تمام اداروں سے کوارڈینیشن مکمل ہے۔

لاہور کے قذافی اسٹیڈیم میں ہونے والے دونوں میچز کی سیکیورٹی پر 6 ہزار پولیس افسران و اہلکار فرائض انجام دیں گے۔

آئی جی پنجاب نے کہا کہ کھلاڑیوں کی قیام گاہ، روٹس، سٹیڈیمز کے اطراف سرچ، سویپ، کومبنگ اور انٹیلی جنس بیسڈ آپریشنز جاری رکھے جائیں گے۔

انہوں نے کہا کہ سیف سٹیز اتھارٹی کے کیمروں کی مدد سے اسٹیڈیم، ہوٹلز اور ٹیموں کے روٹ کی مانیٹرنگ یقینی بنائی جائے گی۔

خواتین شائقین کرکٹ کی سکیورٹی، چیکنگ کیلئے لیڈی پولیس اہلکار تعینات کی جائیں گی۔

ڈاکٹر عثمان انور نے کہا کہ ٹریفک کا بلاتعطل بہاؤ، مناسب پارکنگ یقینی بنانے کیلئے ٹریفک پلان پر عملدرآمد یقینی بنایا جائے گا۔

ان کا کہنا تھا کہ ڈولفن سکواڈ، پولیس ریسپانس یونٹ، ایلیٹ فورس ٹیمیں میچز کے دوران موثر پٹرولنگ کریں۔

آئی جی پنجاب نے ہدایت کی کہ اسٹیڈیم کے داخلی خارجی راستوں، انٹری گیٹس پر تعینات عملہ شہریوں کے ساتھ خوش اخلاقی سے پیش آئے۔

آئی جی پنجاب ڈاکٹر عثمان انور نے مزید کہا کہ شائقین کرکٹ محفوظ ماحول میں میچز سے لطف اندوز ہونے کے لئے پنجاب پولیس کی ہدایات پر عمل کریں۔