غزہ پر اسرائیلی بربریت کے خلاف امریکہ کی مختلف یونیورسٹیز کے طلباء کے جانب سے احتجاج اور دھرنا جاری ہے۔

تفصیلات کے مطابق امریکی یونیورسٹیز میں طلباء غزہ پر اسرائیلی بربریت اور ظلم کے خلاف بڑی تعداد میں مظاہرہ کر رہے ہیں جبکہ حکام مظاہروں کو ختم کرنے کی کوشش کر رہے ہیں۔

پولیس نے پیر کی رات نیو یارک یونیورسٹی (این وائی یو) کے ایک کیمپ کو توڑنے کی کوشش کی اور متعدد گرفتاریاں کیں۔

اس سے قبل ییل یونیورسٹی میں درجنوں طالب علموں کو گرفتار کیا گیا تھا جبکہ کولمبیا یونیورسٹی نے طلباء کے احتجاج کے باعث ذاتی طور پر کلاسیں منسوخ کردی تھیں۔

7 اکتوبر کو اسرائیل پر حماس کے حملے کے بعد سے اسرائیل غزہ جنگ اور آزادی اظہار کے بارے میں احتجاج اور گرما گرم بحث نے امریکی کیمپسوں کو ہلا کر رکھ دیا ہے۔

امریکہ میں دونوں اسرائیلی اور فلسطینی موقف کے حامی طالب علموں کا کہنا ہے کہ اس کے بعد سے یہود مخالف اور اسلاموفوبیا کے واقعات میں اضافہ ہوا ہے۔

گزشتہ روز ہونے والی طلباء کی احتجاجی ریلیوں کے بارے میں پوچھے جانے پر صدر جو بائیڈن نے کہا کہ وہ یہود مخالف مظاہروں اور ان لوگوں کی مذمت کرتے ہیں۔

یہ احتجاجی تحریک گزشتہ ہفتے اس وقت سرخیوں میں آئی تھی جب نیو یارک سٹی پولیس کو کولمبیا کے کیمپس میں بلایا گیا تھا اور 100 سے زائد مظاہرین کو گرفتار کیا گیا تھا۔