وفاقی وزیر منصوبہ بندی احسن اقبال کا کہنا ہے کہ افلاطون کے فیصلوں کی سز عوام کو مل رہی ہے۔

تفصیلات کے مطابق ظفروال میں ایک عوامی اجتماع سے خطاب کرتے ہوئے وفاقی وزیر احسن اقبال نے کہا کہ عوام نےذمہ داری ڈالی ہے بھرپور طریقے سے کوشش کر رہے ہیں کہ پاکستان کو اپنے پاؤں پہ کھڑا کیا جائے۔

انہوں نے کہا کہ سابق حکومت کی جانب سے جو تباہی کی گئی 2018 اور 2022 میں اس کی مثال نہی ملتی، ملکی معیشت  میں جوکانٹے بوئے گئے ان سے پاکستان معیشت تباہ ہوئی۔

احسن اقبال کا کہنا تھا کہ اپوزیشن میں تھا اور کہا کرتا تھا کہ جو معاہدے بانی پی ٹی آئی آئی ایم ایف کیساتھ کر رہا ہے ہمارے پیروں کی بیڑیاں ہیں اور کئی سال تک ہمیں اس کے نتیجے میں مہنگائی کی صورت بھگتنا پڑے گی۔

 وفاقی وزیر نے کہا کہ کوشش کریں گے ان کو دوبارہ آہستہ آہستہ پٹری پر لے کر آئیں گے، معیشت کے لیے یہ سال مشکل ہو گا، مجھے یقین ہے کہ اگر ہم نے سال ڈیڑھ سال صحیح فیصلے اور صحیح  سفر جاری رکھا تو ضرور کامیاب ہوں گے۔

احسن اقبال کا کہنا تھا کہ جب ایکسیڈنٹ ہو جائے تو اس کے بعد مریض کو اسپتال میں علاج کے لیے لایا جاتا ہے تو ڈاکٹر اسے حلوہ یا چاکلیٹ نہیں کھلاتا بلکہ اسے کڑوی دوائی کھانی پڑتی ہے۔

انہوں نے کہا کہ مریض کا آپریشن بھی ہوتا ہے جو تکلیف سے ہوتا ہے لیکن وہ علاج کا حصہ ہوتا ہے، آپریشن ہو جاتا ہے دوائی مکمل ہو جاتی ہے تو مریض صحت مند ہو جاتا ہے۔

 وفاقی وزیر نے کہا کہ ایک ارب ڈالر کا گندم کا سودا کر کے ہمارے کسانوں کی فصل کو مٹی میں ملا دیا، اب گندم کےجہاز لنگر انداز ہو رہے ہیں، باہر سے گندم برآمد ہو کر یہاں پر آ رہی ہے اور ہماری فصل تیار کھری ہے۔

انہوں نے کہا کہ اس حکومت کو بھی اس کا سامنا کرنا پڑ رہا ہے جب ہماری فصل آنے والی ہے تو ان افلاطونوں نے باہر سے گندم منگوا لی، اس فیصلے کی سزا کسان اور عوام کو مل رہی ہے۔

وفاقی وزیر منصوبہ بندی احسن اقبال نے مزید کہا کہ وزیراعظم نے اس کی انکوائری کا حکم دے دیا ہے۔