صوبائی کابینہ نے بلوچستان کی تاریخ میں پہلی بار باردانہ کی خریداری کے طریقہ کار کو تبدیل کرنے کا فیصلہ کرلیا۔

وزیراعلٰی بلوچستان میرسرفرازبگٹی کی زیر صدارت صوبائی کابینہ کا دوسرا اجلاس منعقد ہوا۔  اجلاس میں بلوچستان کی تاریخ میں پہلی مرتبہ بار دانہ کی خریداری کے طریقہ کار کو تبدیل کرنے کا فیصلہ کیا گیا۔

کابینہ نے فیصلہ کیا کہ حسب ضرورت جدید ماحول دوست بیگز خریدے جائیں گے، آئندہ مالی سال سے کاشتکاروں کو بار دانہ کی فراہمی کے بجائے رقم ادا کی جائے گی۔

صوبائی کابینہ نے آئندہ سال سے سرکاری سطح پر بار دانہ کی خریداری ختم کرنے کا فیصلہ کرلیا۔ فیصلے میں کہا گیا کہ محکمہ خوراک کے پاس دستیاب 58000 باردانہ شفاف طریقے سے تقسیم کیا جائے گا۔

صوبائی کابینہ نے سرکاری سطح پر گندم خریداری کی منظوری دے دی۔ محکمہ خوراک رواں سال پانچ لاکھ میٹرک ٹن گندم خریدے گا۔

صوبائی کابینہ نے بلوچستان میں گندم کی امدادی قیمت مقررکرنے کی منظوری دے دی۔ کابینہ نے فیصلہ کیا کہ بلوچستان میں گندم کی امدادی قیمت سندھ کے مساوی ہوگی، فیصلہ بلوچستان سے گندم کی اسمگلنگ سندھ کی جانب روکنے کے لئے کیا گیا۔

وزیراعلٰی بلوچستان نے گندم خریداری میں شفافیت کو یقینی بنانے کے لیے اراکین اسمبلی پر مشتمل مانیٹرنگ کمیٹی قائم کردی۔

وزیراعلٰی بلوچستان سرفرازبگٹی کا کہنا ہے کہ بار دانہ میں کرپشن ہوتی ہے جسے روکیں گے، انھوں نے سیکریٹری خوراک کو ہدایت کی کہ تمام خریداری مراکزمیں بار دانہ کی دستیابی کو یقینی بنایا جائے۔ بار دانہ سنٹرز سے باہر نہیں جائے گا۔

انھوں نے کابینہ اجلاس میں ہدایت کی کہ محکمہ خوراک سے کرپشن کا دھبہ صاف کرنا ہوگا، گندم کی خریداری صرف منظور شدہ مراکز پر ہوگی، مراکز پر پہلے آئیے پہلے پائیے کی بنیاد پر گندم خریداری ہوگی۔

بلوچستان کابینہ نے بلوچستان پولیس کے شہداء کے لئے پانچ سو ملین روپے کی گرانٹ کی بھی منظوری دی