کراچی: بلاول بھٹو اور وزیر داخلہ سندھ سمیت میئر کراچی نے نوشکی میں دہشت گرد واقعہ کی شدید مذمت کردی۔

پاکستان پیپلزپارٹی کے چیئرمین بلاول بھٹو زرداری نے بلوچستان کے علاقے نوشکی میں دہشت گردی کے واقعہ کی مذمت کرتے ہوئے کہا کہ وزیر اعلیٰ بلوچستان معصوم انسانوں کے قاتلوں کو انصاف کے کٹہرے میں لائیں۔

انہوں نے کہا کہ بے گناہ اور معصوم انسانوں کے قاتلوں کو عبرت ناک سزا ملے گی، بلوچستان میں خونریزی کرنے والے بلوچستان کی ترقی کے دشمن ہیں جب کہ چیئرمین پیپلزپارٹی نے نوشکی میں قتل ہونے والوں کے لواحقین سے ہمدردی اور تعزیت کا اظہار کیا۔

سندھ کے وزیر داخلہ، قانون و پارلیمانی امور ضیاء الحسن لنجار نے نوشکی میں دہشت گردی واقعہ کی مذمت کرتے ہوئے واقعہ میں جاں بحق افراد کے ایصال ثواب کے لئے دعا کی جب کہ لواحقین کے لئے صبر جمیل کی بھی دعا کی۔

انہوں نے کہا کہ شرپسند عناصر بلوچستان سمیت ملک کا امن خراب کرنا چاہتے ہیں، سیکیورٹی فورسز دہشت گردوں سے پاک وطن کو پاک کرکے دم لیں گے جب کہ ہمیں مل کر نفرت کی آگ کو مٹانا ہے۔

دوسری جانب میئر کراچی و ترجمان سندھ حکومت بیرسٹر مرتضی وہاب نے نوشکی میں دہشت گردی کے واقعہ کی شدید مذمت کرتے ہوئے جاں بحق افراد کے ایصال ثواب اور لواحقین کے لئے صبر جمیل کی دعا کی۔

بیرسٹر مرتضی وہاب نے کہا کہ دہشت گرد بلوچستان کا امن خراب کرنے کے درپے ہیں، نفرت پھیلانے والوں کے لیے پرامن پاکستان میں کوئی جگہ نہیں ہے۔