قازقستان کی سرحد سے متصل روسی شہر میں سیلاب نے تباہی مچا دی، پورا شہر زیر آب آ گیا۔

تفصیلات کے مطابق روس کے شہر اورنبرگ میں آنے والے سیلاب کی وجہ سے پانی کی سطح دو میٹر تک بڑھ گئی ہے اور کچھ گھروں کی چھتیں دکھائی دے رہی ہیں۔

شہر میں سیلابی پانی کی سطح بلند ہونے سے قبل خطرے کے سائرن بجائے گئے اور میئر نے رہائشیوں پر زور دیا کہ وہ گھر چھوڑ دیں۔

روسی شہر اورنبرگ میں پانی کی سطح میں آج گیر معمولی اضافہ دیکھنے میں آیا جس کے بعد کہا جا رہا ہے کہ آنے والے دنوں اور ہفتوں میں پڑوسی علاقوں میں بھی سیلاب پھیلنے کا امکان ہے۔

اس سیلاب سے پڑوسی ملک قازقستان بھی بری طرح متاثر ہوا ہے اور گزشتہ ہفتے ایک لاکھ افراد کو ان کے گھروں سے نکالا گیا ہے۔

محکمہ موسمیات کے ماہرین نے اس سیلاب کو 80 سالوں میں خطے میں آنے والا بدترین سیلاب قرار دیا ہے۔

یہ صورتحال اس وقت پیش آئی جب گزشتہ ہفتے یورپ کے تیسرے سب سے بڑے دریا یورال سمیت کئی دریاؤں کے کنارے پھٹ گئے تھے۔ روس اور قازقستان میں لوگوں کے پانی میں بہنے کی بھی اطلاعات ہیں۔

ماہرین کا کہنا ہے کہ زیادہ موسمی درجہ حرارت کی وجہ سے برف تیزی سے پگھل رہی ہے، جس میں بھاری بارشیں بھی شامل ہیں۔

حکام کے مطابق اورنبرگ میں دریائے یورال میں پانی کی سطح  11.43 میٹر (37 فٹ) تک پہنچ گئی۔ حکام کا کہنا ہے کہ وہاں سے 10 ہزار سے زائد افراد کو محفوظ مقامات پر منتقل کیا گیا ہے جبکہ 11 ہزار 700 گھروں میں پانی بھر گیا ہے۔

میئر سرگئی سالمین نے کچھ اضلاع سے مزید بڑے پیمانے پر انخلا کا مطالبہ کیا ہے۔