ترجمان دفتر خارجہ  کا کہنا ہے کہ بھارتی وزیر دفاع کا پاکستانی شہریوں کو نشانہ بنانے دعویٰ اعتراف جرم ہے۔

تفصیلات کے مطابق  دفتر خارجہ  سے جاری بیان میں بھارتی وزیر دفاع کے اشتعال انگیز بیان پر شدید رد عمل دیتے ہوئے کہا  گیا کہ  ٹیلی ویژن انٹرویو کے دوران بھارتی وزیر دفاع کے پاکستان میں بھارت کے خفیہ آپریشنز کے بارے میں بیان کو مسترد کرتے ہیں۔

ترجمان دفتر خارجہ نے کہا کہ 25 جنوری کو پاکستان نے بھارت کی جانب سے اپنی سرزمین پر ماورائے عدالت ہلاکتوں میں ملوث ہونے کے بارے میں ناقابل تردید ٹھوس شواہد پیش کیے تھے۔

دفتر خارجہ  کے بیان میں کہا گیا کہ  بھارت کی جانب سے شہریوں کو ماورائے عدالت طور پر ہلاک کرنے کے لیے تیاری پر مصر رہنا اعتراف جرم ہے۔ عالمی برادری پر لازم ہے کہ وہ بھارت کو اس کے گھناؤنے اور غیر قانونی اقدامات پر جواب دہ ٹھہرائے۔

بیان میں کہا گیا کہ  پاکستان کسی بھی جارحیت کے خلاف اپنی خود مختاری کے تحفظ کے لیے پرعزم ہے۔ پاکستان نے فروری 2019 میں بھارت کو اس کی مہم جوئی کا بھرپور جواب دیا تھا۔ فروری 2019 میں پاکستان کے منہ توڑ جواب نے بھارت کے عسکری بالادستی کے کھوکھلے دعوؤں کو بے نقاب کیا تھا۔

ترجمان دفتر خارجہ   نے کہا کہ  بھارت میں حکمران طبقہ انتخابی فوائد کے لیے انتہاپسند قوم پرستی پر مبنی نفرت انگیز بیانیے سے ایندھن فراہم کرتا رہتا ہے۔ ایسی کوتاہ بینی اور غیر ذمہ داری پر مبنی رویہ خطے کے امن کو خطرے میں ڈالتا ہے ۔ایسا رویہ طویل المدت سطح پر کسی بھی مثبت روابط کے امکانات کو بھی دھندلا دیتا ہے۔

ترجمان دفتر خارجہ نے کہا کہ  پاکستان ہمیشہ سے خطے میں امن کے لیے پرعزم رہا ہے ۔ خطے میں امن کے لیے پاکستان کی خواہش کو غلط نہ سمجھا جائے۔

بھارتی وزیردفاع کا برطانوی اخبارکی رپورٹ پر پاکستان میں دہشتگردی کااعتراف

بھارتی وزیردفاع راج ناتھ سنگھ نے برطانوی اخبار دی گارڈین کی رپورٹ پر پاکستان میں دہشتگردی کااعتراف  کرتے ہوئے  ریاستی دہشتگردی کی تصدیق کردی۔

بھارتی وزیر دفاع نے دی گارڈین کی رپورٹ پر دہشتگردی کا اعتراف کرتے ہوئے انکشاف کیا کہ بھارت نے پاکستانی شہریوں کو قتل کروایا۔

راج ناتھ سنگھ نے حال ہی میں ایک بھارتی ٹیلیویژن چینل کو انٹرویو کے دوران کہا تھا کہ  اگر کسی بھی پڑوسی ملک سے کوئی دہشت گرد بھارت میں خلل ڈالنے یا یہاں دہشت گردانہ سرگرمیوں میں ملوث ہونے کی کوشش کرے گا تو اس کا منہ توڑ جواب دیں گے، اگر وہ بھاگ کر پاکستان جائے گا تو پاکستان میں گھس کر ماریں گے۔

بھارتی وزیر دفاع نے کہا تھا کہ بھارتی وزیر اعظم نریندر مودی نے واضح کر دیا ہے کہ یہ پالیسی  بالکل درست ہے اور  بھارت میں ایسا کرنے کی صلاحیت ہے، پاکستان بھی اسے سمجھنے  لگا ہے۔