بنگلہ دیش کی حکمران جماعت کے رکن پارلیمنٹ انوار العظیم انار بھارت کے شہر کولکتہ میں مردہ حالت میں پائے گئے ہیں۔

بنگلہ دیش کے وزیر داخلہ اسد الزماں خان نے کہا ہے کہ بنگلہ دیش کی حکمران جماعت کا ایک رکن لاپتہ ہونے کے ایک ہفتے بعد بھارتی شہر کولکتہ میں مردہ حالت میں پایا گیا ہے۔

لواحقین کا کہنا ہے کہ عوامی لیگ کے انوارالعظیم انار علاج کے لیے بھارت پہنچنے کے ایک دن بعد 13 مئی کو لاپتہ ہوگئے تھے۔

56 سالہ انوارالعظیم انار، جنہوں نے عوامی لیگ پارٹی کی جانب سے سرحدی ضلع جھنیدہ کے ایک حلقے سے مسلسل تیسری بار کامیابی حاصل کی تھی، 13 مئی کو علاج کی غرض سے بھارت جانے کے ایک دن بعد لاپتہ ہو گئے تھے۔

بنگلہ دیشی وزیر داخلہ اسد الزماں خان نے نامہ نگاروں کو بتایا کہ اس موت کے الزام میں تین بنگلہ دیشیوں کو گرفتار کیا گیا ہے۔ وزیر نے چہارشنبہ کے روز کہا کہ ہم تحقیقات کی خاطر فی الحال تمام معلومات کا انکشاف نہیں کرسکتے ہیں۔

شہر کے ایک ڈپٹی پولیس کمشنر نے بتایا کہ انوارالعظیم انار کی لاش چہارشنبہ کی علی الصبح کولکتہ کے نیو ٹاؤن میں ایک خالی مکان سے ملی۔

بنگلہ دیش کے وزیر خارجہ حسن محمود نے کولکتہ میں بنگلہ دیشی مشن سے ملنے والی معلومات کا حوالہ دیتے ہوئے کہا کہ پولیس کو اس فلیٹ سے لاش نہیں ملی جہاں ان کے بارے میں خیال کیا جاتا ہے کہ انہیں قتل کیا گیا تھا۔

رکن پارلیمنٹ کی گمشدگی کے بارے میں ان کے رشتہ داروں نے 18 مئی کو شمالی کولکتہ کے بارا نگر پولیس اسٹیشن میں ایک رپورٹ درج کرائی تھی۔

رپورٹ کے مطابق، انوارالعظیم انار 12 مئی کو کولکتہ میں گوپال بسواس نامی شخص کی رہائش گاہ پر گیا تھا۔ اگلے دن، وہ بسواس کی رہائش گاہ سے ڈاکٹر کو دکھانے کے لیے روانہ ہوئے، انہوں نے اپنے اہل خانہ کو مطلع کیا کہ وہ شام کو بنگلہ دیش واپس آئے گا۔