لاہور: وفاقی وزیر داخلہ محسن نقوی کی زیر صدارت اجلاس میں نیشنل رجسٹریشن پالیسی بنانے کا فیصلہ کیا گیا ہے۔

وفاقی وزیر داخلہ محسن نقوی کی زیر صدارت نادرا کے حوالے سے جائزہ اجلاس ہوا جس میں نیشنل رجسٹریشن پالیسی بنانے کا فیصلہ کیا گیا۔

وفاقی وزیر داخلہ محسن نقوی کا کہنا ہے کہ شناختی کارڈ اور شہریت کا مستند ہونا انتہائی اہمیت کا حامل ہے، اس پالیسی پر تمام صوبوں کا اتفاق رائے بھی حاصل کرنا ہوگا۔

وزیر داخلہ نے کہا کہ یونین کونسل کو اس ضمن میں بنیاد کا درجہ حاصل ہے، نادرا کی یونین کونسلز تک رسائی اس سلسلے میں انتہائی ضروری ہے۔ پالیسی سے شہریت کے انداراج کو شفاف اور فول پروف بنایا جائے گا۔

محسن نقوی کہتے ہیں کہ نئی پالیسی سے شہریت کے غیر قانونی اندراج کو بھی روکا جاسکے گا، جس کی وجہ سے غیر ملکیوں کو شناختی کارڈ اور پاسپورٹ جاری ہونے کا معاملہ سامنے آیا۔

انہوں نے کہا کہ اجلاس میں چھ بڑے شہروں میں نادرا سینٹرز میں اضافے کے پلان کا جائزہ لیا گیا۔ کراچی، لاہور، پشاور، کوئٹہ، اسلام آباد اور راولپنڈی کے علاوہ ملتان کو بھی اس پلان میں شامل کرنے کا فیصلہ کیا گیا ہے۔

وزیر داخلہ نے مزید کہا کہ اس پلان کو حتمی شکل دے کر اگلے چند روز میں اس پر عمل درآمد کا آغاز کیا جائے تاکہ عوام کو غیر ضروری رش اور زحمت سے بچایا جاسکے جب کہ عوام کی سہولت کیلئے خدمت مراکز میں بھی نادرا کاؤنٹرز کا آغاز کیا جائے گا۔