لاہور: اسپیکر نے سپریم کورٹ کے فیصلے کی روشنی میں حکومتی اتحاد کو ملنے والی خواتین اور اقلیتوں کی مخصوص ںنشستیں معطل کردیں۔

پنجاب اسمبلی کا اجلاس دو گھنٹے تاخیر سے شروع ہوا جب کہ اجلاس کی صدارت اسپیکر ملک احمد خان کر رہے ہیں۔

پنجاب اسمبلی میں سپریم کورٹ کے فیصلے کی روشنی میں خواتین اور اقلیتوں کی مخصوص نشستوں کی معطلی کا فیصلہ کرلیا۔ اسپیکر پنجاب اسمبلی نے اپوزیشن رکن رانا آفتاب کا مخصوص نشستوں پر پوائنٹ آف آرڈر کو درست قرار دے دیا ہے۔

اپوزیشن رکن نے سپریم کورٹ کے فیصلے کی روشنی میں سنی اتحاد کونسل کو ملنے والی خواتین اور اقلیتوں کی مخصوص نشستیں مسلم لیگ نون اور دیگر جماعتوں کو ملنے کے خلاف سپریم کورٹ کے فیصلے کا حوالہ دیا تھا۔

اسپیکر پنجاب اسمبلی نے ایوان میں سپریم کورٹ کا فیصلہ پڑھ کر سنایا اور اسپیکر نے ارکان کی معطلی کے حکم پر آج سے عملدرآمد کرنے کا حکم دے دیا۔

حکومتی اتحاد کے معطل ہونے والے ارکان کی تعداد کم از کم 27 ہے جن میں 24 خواتین کی مخصوص نشستیں جب کہ 3 اقلیتی نشستیں ہیں۔

معطل ہونے والوں میں اقلیتی ارکان اسمبلی طارق مسیح گل، وسیم انجم اور بسرو جی شامل ہیں۔

معطل ہونے والی خواتین ارکان میں مقصوداں بی بی، روبینہ نذیر، سلمہ زاہد، کنول نعمان، زیبا غفور، سعیدہ ثمرین تاج، شہر بانو، آمنہ پروین اور سیدہ سمیرا احمد شامل ہیں۔

علاوہ ازیں عظمیٰ بٹ ،افشاں حسین، شگفتہ فیصل، نسرین ریاض، ساجدہ نوید ،فرزانہ عباس، ماریہ طلال، تاشین فواد، عابدہ بشیر، سعدیہ مظفر، فائزہ مومنہ، عامرہ خان، سمعیہ عطا، راحت افزا اور رخسانہ شفیق بھی شامل ہیں۔